رسالة لأمى

أمى الحبيبة

فى محاولة لتفادى كراهية يوم عيد الأم والتأقلم معاه ..انا بابعت لك رسالة يمكن تعوض شوية من الوحشة اللى انتى وحشهالى

بداية..انا اسفة لكونى خيبة أمل كبيرة جدا..وآسفة على كل اللى حصل السنة اللى فاتت..بس ماينفعش آخر لقا بينا يكون عتاب..انا عارفة انى خيبت ظنك فيا وانى كان لازم اكون اقوى من كده ..واعبر عن نفسى بقوة..بس للأسف طلعت أضعف من كده

..طلعت اضعف من انى اقول لهم كلهم انتوا غلط..تعبت من كتر الكلام والمناهدة..وماحدش بيتغير إلا قليل قوى ..حسيت انى ضعيفة وتايهة

سامحينى..وانا هاحاول اكون احسن شوية ..آسفة بجد.

احم..وآسفة على كمية الشتايم اللى حصلت..وكمية الغلطات الشنيعة..وكمية الغباء والغرور اللى وصلت لهم ...بس ماحدش بيتعلم من غير مايغلط للأسف ..ومن غير مايتوجع ويتكفى على وشه ونفسه يتخنق شوية فى الطين خاصة لو كان بالغباء ده .

تعرفى ياماما..انا بدأت استمتع بالأغانى القديمة قوى...وباحاول ارجع اغنى تانى ..وباحاول ارجع اقرا واكتب تانى..كنت بطلت كل حاجة..تخيلى!

المشكلة الحقيقية فى غيابك ..انى قليل قوى لما بالاقى اللى بيحفز الشعلة اللى جوايا..كل المناكفة اللى بينا هى اللى كانت بتخلينى عايشة ودافية

ذكاءك ومناقشاتك وحبك وقناعاتك كانت بتخلى خلايا مخى متصنفرة دايما من الصدأ بتاع قلة الاستخدام

ودايما فكرة رضاكى واعجابك الهدف اللى ماكنتش اقبل اقل من انى اوصله ..واحيانا التمرد عليكى – الاعتراف بالحق فضيلة –

ايوة كان مهم انى اغلس واثبت استقلاليتى فى حاجات..واثبت وجهة نظرى انها مش غلط ..وان القواعد اتخلقت عشان نكسرها..او على الاقل نلويها ونطبعها بطباعنا وتميزنا ...عشان اثبت تميزى واختلافى..وان الناس مش لازم يكونوا شبه بعض عشان يكونوا صح ...الصح له اوجه كتير قوى...الحلال اكبر من الحرام بكتير..وقواعد الناس لنفسهم مش لينا.

ودايما نظرة الخذلان وخيبة الأمل اللى فى عينيكى هى الحاجة اللى باحاول اتجنبها تجنبى لنار جهنم ...ممكن استحمل خناقنا ...ومناكفاتنا..وتستحملى عنادى و وقاحتى لأقصى درجة .

انا عارفة انى مش باروح المقابر اللى هى المفروض انى بازورك يعنى..بس انا مش مقتنعة انك هناك خالص..انا عارفة انك عند ربنا فى السما ..وعارفة انك حواليا ومحاوطانى ..واوقات كتير باحس بدفاكى .

وحشتينى قوى ..وحشتينى قوى قوى...وكان نفسى فى حضن كمان..وكان نفسى اسجل صوتك..وكان نفسى اتصور معاكى..وكان نفسى تبقى موجودة كلك على بعضك .

عارفة ان ربنا اختار الأفضل..عارفة حكمته سبحانه وتعالى ومقدراها جدا والله..بس ده ما يمنعش انى افتقدك..مايمنعش انى احس باليتم من غيرك..واحس بالوحدة

ولانك ماكنتيش أمى بس..كنتى أمى وصديقتى المفضلة ونديمتى..رفيقة الفكر والنقاش والعلم واستاذتى..كنتى المنارة اللى مهما تهت باستدل بيها على الوطن ..كنتى الوطن

فى الواقع..ماكنتيش...انتى لازلتى كل ده..ومافيش اى حاجة ولا اى حد قادر يملا الفراغ الرهيب ده ..ولا حد قادر يحس النار اللى تحت الرماد اللى وحدك كنتى بتنوريها .

سامحينى يا أمى..سامحينى على حاجات كتير قوى

وسامحينى انى بقيت باكره عيد الأم ويوم اليتيم بغباء فى المرحلة دى..وسامحينى انى كرهت بعض مبادىء زرعتيها فيا فى المرحلة اللى فاتت....الضعف استخرج اسوأ مافيا

انا باحاول ارجع تانى ..باحاول اكون حد كويس تفتخرى بيه من جواكى ..بابتسامة مش عارفة تداريها باى معاكسة فيا

بالمناسبة..المقطوعة الموسيقية دى يانى اهداها لمامته عشان دايما كانت بتحمسه وبتشجعه

وانا باهديهالك لحد ما اعرف اهديكى حاجة انا اللى كاتباها او عزفاها بنفسى

يانى ..فيليتا

وحشتينى...بحبك