مصر بعد 25 يناير ....زى مصر قبل 25 يناير على فكرة ...كل اللى حصل فرق صدمة ...وتوجيه الحماسة فى تنضيف الشوارع بدل الكتابة على الفيس ..وإن شوية رءوس فساد اتمسكت !
لكن كتغيير جذرى...ماحصلش ..هو بس فرق صدمة!
إذا كانت أمن الدولة هى اللى فجرت كنايس والحسين وعذبت سلفيين وإخوان ...فهى كمان عملت تغيير فكرى فى الناس على مدار 30 سنة مش هيخلص فى شهرين..خلينا صرحا شوية ...لسه الناس بتبص للمسيحيين على إنهم مختلفين عننا ...ولسه بنبص للإخوان والسلفيين على إنهم إرهابيين متخفيين !!
بس الكلام ده مش من أول إمبارح بليل على فكرة...الكلام ده بقاله كتير أزيد من اللازم...ولو كان المتطرفين منهم معاهم سلاح..كانوا خلصوا على بعض من زمان
يبقى بلاش فتى واستهبال..وكل ما تحصل حادثة نقول فتنة طائفية..اعتقد باين أوى يعنى إن على الأقل 95% من الحوادث اللى بين المسلمين والمسيحيين كانت شغل أمن دولة...ولا هى الناس هتجيب السلاح منين؟!
ولو كانت ناس فعلا اللى جايبة سلاح يبقى برده غلط على أمن الدولة..ولا هى فالحة بس تراقب الناس فى الفنادق وفى الحمامات وسايبة السلاح داير فى البلد ؟!
بس دلوقتى الوضع مختلف...لو كل واحد ماحكمش عقله ..وافتكر انه بيدافع عن دينه ضد عدو ...يبقى هنضيع !
لازم الكل يفهم إن ده وقت نحكم جوهر أدياننا ...اللى هى إصلاح الأرض ..اللى هى اننا نبنى البلد..وندى لكل حاجة حجمها و وقتها..مش وقت تركيز فى كلام أهبل ...لانها مش ناقصة هبل..ولو صبرنا على الهبل وسكتنا ..احنا مش هنجوع بس زى الاضرابات الفئوية..لا ده احنا هنسحل بعض قبل ما نتسحل على المستوى الدولى ..وبدل مانبنى مستقبلنا...بندبحه ونردم عليه بأوسخ تراب ممكن...تراب الغباء والتعصب والجهل ...
مش هاقلكم غير افتكروا انتوا مين كويس ...افتكروا ان وقت الشدة الحقيقى معدنكم الحقيقى ظهر وبقيتوا واحد بجد...و وقت الشدة لسه ماخلصش..بالعكس دلوقتى اشد واخطر ...
وزى ما ابهرتوا الدنيا كلها وخليتوها تحلف بيكم يا مصريين ...ماينفعش تغلبوا التراث الغبى اللى سابوه لنا يتحكم فينا...وبدل ما يبقى أثر الصدمة ..المفروض نحوله لعادة عندنا ...ونحول طاقاتنا لمكانها الصح ..اللى ربنا خلقنا عشانه ...إننا نعمر أرضنا ونبنيها صح ..بداية من عقولنا ...لحد بيوتنا
6 Responses to "الطائفية ..والثورة ..والهبل":
انا مقدره انفعالك في المقال لاني فاهمه انه خوف علي البلد وح اقول نفس الكلام اللي قلته من فتره ع الفيس بوك انه اللي بيحصل هو اخر محاوله لعناصر النظام السابق لاخماد الثوره وانه تغير سياسي ممكن يحصل في سنه او اتنين لكن تغير المجتمع محتاج وقت طوييييييييييل ومحتاج صبر كتييييييييير وده الاهم محتاج المثقفين واللي فاهمين يفتحوا عيون الغافلين البلد محتجانا نشتغل ونموت عشانها حتي لو ماعشنانش ومرتباتنا ما زادتش ومجبناش لاب توب وعربيات ع الاقل لما تموت نفسك دلوقت عشان بلدك انت بتتعب وانت علي يقين انه بكره احسن بشرط كلنا نعمل لصالح البلد كفايه انانيه وكفايه رجعيه في تفكيرنا ياريت نطرد خوفنا او ع الاقل مننشرهوش ولازم نعترف اننا غلطنا بس نصحح غلطنا لصالح بلدنا ولصالح بكره االلي هو ملك ولادنا
رضا
للأسف فعلاً يا ريم امن الدولة فعلاً هي اللي محركة الفتنة دي لو تلاحظي انها حصلت بالتزامن مع موضوع اقتحام مباني امن الدولة
الخطة المرة دي كانت محكمة
بس انا متطمنة على بلدي
ان شاء الله هنعدي منها
رودى
بصى يا رودى..المشكلة مش فى فلول النظام..دول سهل أوى يتضربوا بالجزمة
المشكلة الحقيقية فى نقص الوعى للناس!!
اصل لو الناس واعية بجد وبتسمع ...يبقى سهل يتجاوزوا الصغائر
لكن ناس ماعندهاش وعى .هتفضل طول عمرها فى الوحل !
وربنا يستر على بكرة يارب
ميرسيه يا قمرى لردك :)
سمو الأميرة
منورة البروفايل يا قمرى أولا
انا متطمنة من ناحية الفتنة بشكل كبير
ومن ردود فعل المسيحيين حاسة إنهم ملهوفين زينا إننا نكون واحد بجد...
مشكلتى مش مع الفتنة
انا قلقى من الجهل وقلة الوعى يا بنتى
ربنا يسترها ونعدى منها بجد ..يارب
ميرسيه يا قمرى ربنا يخليكى
ونورتى المدونة بردك :)
اولا تحية لاجمل بلد بحبها فى العالم الكس
التحول فى حياة الشعوب ليس بالامر السهل
لكن الايجابيات كثيرة
الاقبال على الانتخابات
كسر الحاجز النفسى مع الشرطة رغم التاثير السلبى بغياب الامن
تاثير الشارع على الحكومة و محاولة الاحساس بنبض الشارع
التغيرات كثيرة و القادم افضل بأذن الله
مش للنشر و من الممكن ازالته
رجاء تصحيح ان حبيبى و اديبى الراحل عبد الوهاب مطاوع ليس دكتور وان كان فى قيمته اكبر من هذا اللقب
تحياتى
إرسال تعليق