لسه قارية من مافيش ..حكاية البياعين فى ميدان الساعة ضربوا عربيات البوليس بالحجارة ...وشفت الفيديو !!
واليوم اللى قبله قرات عن خالد محمد سعيد اللى مات نتيجة تعذيبه من مخبرين فى قسم سيدى جابر!
وطبعا دى لا أول مرة البوليس يتضرب ..ولا اول مرة البوليس يقتل!!
وبصراحة مطلقة ..انا لا ليا فى اعتصامات ولا مظاهرات ولا وقفات احتجاجية ...ولا شايفاها بتعمل حاجة اكتر من انها بتهدى الغضب اللى جوايا ..لا هترد للقتيل حقه ..ولا هتوقف الظالم عن ظلمه!!!
وانا محتاجة اوى للغضب ده ..محتاجاه عشان يحمينى من اليأس من شدة الفساد ..محتاجاه لانه نابع من حبى للبلد دى...محتاجاه لانه بيدينى طاقة افكر واتحرك ..ولو فى نطاق محدود اوى!
ومن واقع الحادثتين اللى فوق ..ومن واقع واقعنا المنيل بستين نيلة زى ماكل الاحداث بتوضح ..ان الفساد مش وصل للركب ..ده وصل للحناجر!
الموضوع دلوقتى بقى بين ايدين القانون ...وربنا يستر بصراحة...لان وضع الفاعلية القانونية ..وخاصة بعد احداث الغربية مايبشرش بخير بصراحة!!
بس عشان نكون صرحا سوا...مش دايما القانون بيبرد نار الضحية ...ومع حوادث زى دى ..مش هتنفع عقاب من نوعية وقف عن العمل ..ولا نظرية كخة يا حبيبى ماتعملش كده تانى ..احسن السوعك بالشمعة!!!
جرايم زى دى ..لازم عقابها يكون رادع وعبرة وعظة لكل واحد تسول له نفسه انه يفكر فى حاجة زى دى ..عقاب جريمة زى دى ..لازم يكون فى ميدان عام ...عشان الناس تشوف بعينيها ...مش تتفرج فى برنامج خلف الاسوار والمجرم بيعييييييييييييييط ...والمفروض ان الناس من كتر ما قلبهم بيتقطع ..مش هيعملوا الكخة دى تانى!
لو القانون ما اخدلناش حقنا ...يبقى لازم نعملنا قانون ياخده ..واذا كان عندهم قانون الطوارىء بتاعهم ..لازم يكون عندنا الطوارىء بتاعتنا برده!!!
الفكرة قريبة الى حد كبير من فكرة الانتخابات البديلة ..والقياس مع الفارق !!
احنا نعمل محكمة شعبية .....واللى مانقدرش ناخده بقانونهم ..ناخده بقانوننا احنا !
طبعا فكرة زى دى واسعة الى حد كبير ..لأنها محتاجة خبراء قانون ...وشخصيات ثقة تكون حكام وقضاة فيها – ودى حاجة صعبة اوى دلوقتى زى ما انتوا ملاحظين اكيد!
ومحتاجة لجنة تنفيذ رادعة وقوية وحازمة اوى اوى ...والحكم يكون نافذ المفعول وعلنى!!!
اكيد معظم اللى هيقرا ..هيلاقيها فكرة خيالية ..بس الاختيارات التانية ..زى ماحصل فى ميدان الساعة ...هيبقى مابين هجوم من الشرطة ع الشعب ..والشعب ع الشرطة..والاتنين بيطحنوا فى بعض ..تحت مليون مسمى !!
وفى اختيار اننا نسكت ...وبياعين ميدان الساعة كمان يسكتوا لما يرهبوهم وياخدوا من بضاعتهم من غير تمن ويعاملوهم شر معاملة !
وفى اختيار اننا نفكر فى حلول تانية كمان غير اقتراحى ..لانى اكيد مش عبقرية ..واكيد فى ناس اذكى منى وتفهم احسن منى مليون مرة تقدر تفيد البلد دى ...تقدر تدير البلد دى صح !!!
ممكن تفكروا معايا بجد بقه؟!
وبالمناسبة ..اللى هيحبطنى ف الرد ..يستنى بعد ما اخلص الامتحانات بقه ..مش طالبة انا عندى امتحان بكرة ومافتحتش المادة ...والحياة مش فحلقى خالص بصراحة ...من جهات كتير زيادة عن اللزوم
8 Responses to "قانونهم للطوارىء ..وقانوننا للطوارىء":
مش هقول الا حسبي الله ونعم الوكيل دي هتغني عن كل حاجه ممكن اقولها
تسلم ايديكي ياريم
من الأخر
مفيش فايدة
دة شعب مات و شبع موووت
لا حول ولا قوة الا بالله
انا ح ارغي شويه في الرد معلش
لانه انا بجد متغاظه ومحروقه وحاسه اني عايزه اصرخ مش عشان خالد بالتحديد- ربنا يرحمه يارب- بس عشان كلنا بقينا في حرقت دم الفساد في كل حاجه كله باااايظ ومدمر مافيش حاجه عدله واللي يغيظ انه اللي بيعمل فينا كده حكمنا مش انه بلدنا مستعمره مثلا ولا ان الصهاينه متسلطين علينا لاء لانه حكامنا بيخرصونا وبيدوسوا علي رقابينا
خالد محظوظ لانه مات يعني ارتاح لكن احنا بنموت بالبطيء بنتقتل كل ثانيه
بنطاطي فيها ونقبل الظلم وكل ثانيه بنقبل وندفع الشروه وكل مره بنسكت علي حقنا بنتقتل حتي ولو ماعترضناش وبنتبهدل وتتمسح بكرامتنا الارض لما نعترض .. لصالح مين؟ برضو ح تقولي مؤامرات ومصر مستهدفه؟ ح اقولك كداب الفكره مابقتش في اللي بره خالص الفكره بقت في ظلم اللي هنا كل واحد في منصب و خايف يسيب الكرسي وبيتعامل معانا علي اننا سوفرديم مصر خدامين جلالته عبيد سيادته لا روحنا ولا حياتنا ليهم تمن
الحل من وجهة نظري ثوره مش مجرد محمكه لاء احنا محتاجين ثوره ع الفساد ... صرخه عاليه قوي ترد حقوقنا ونبطل نسكت ع المهم ونتكلم في التافه ونضيع حقوقنا عايزين افعااااااااااااال وكفايه كلام
وف الاخر في حقيقه نفسي يعرفوها .ز الظلم ظلمات يوم القيامه
معلش اني طولت عليكي ياريم
رضا
وفي الاخر قالك الواد كان بيشرب حشيش.. الشيطان استجار من الاعيبهم واعلن اعتزاله
بجد مش عارف اقول ايه علشان ممكن اقول كلام قبيح واخرج عن شعوري وارادتي
ربنا يتولانا برحمته :)
حلو المقال والمدونة يا ريمى
غير معرف
تسلم يارب
وحسبى الله ونعم الوكيل فى كل ظالم
احمد سمير
لسه ماماتش ...الميت مش بيتوجع لما بيغرسوا فى لحمه السكاكين
رضا
ولا يهمك يا قمر..خدى راحتك فى الرد
كل اللى هاقولهولك ..احنا محتاجين ثورة فردية ..كل واحد يبتدى يصحح من نفسه ..ويرفض الغلط ومبدأ مشى حالك وكبر ونفض ...وسلك أمورك
لو كل فرد ابتدى بنفسه ...وكل أب وأم علم ولاده كده..هتلاقى بلد ماشية صح :)
عبد الله
يارب يتولانا جميعا برحمته ...ويعفو عنا
دينا
نورتى المدونة يا قمر
وربنا يخليكى متشكرة لرأيك جدا
الله يصلح الحال :(
إرسال تعليق