بلا منطق ...لأجلك .........خاطرة

لا تحدثنى عن المشاعر ، فهى لا تخضع للمنطق !!
فإن أردت أن تتحدث عنها ، رجاء .. حررنى من المنطق
فكيف أدرك ماذا يعنى جنون الحب وقد قضيت عمرى ملتفة بعباءة بحث الأسباب والنتائج!!
وقبل أن تتحدث عن أحاسيس طالما فاضت بها عيناك ، علمنى أولا لغة عيون العشاق ...
سرت فى حياتى على نهج الفلاسفة والعلماء ، فكل شىء يخضع للتأمل والبحث .. مررت بألف قضية وأكثر .. قضايا زعزعتنى من جذورى ، وقضايا حطمت غرورى ، وكلها زادت من قوة المنطق !!
عرفت عشرات غيرك ...تباحثنا فى آلاف القضايا ..تقارعنا حجة بحجة ،
غلبونى وغلبتهم ، ولكن.....
لم يخبرنى غيرك أن لضحكاتى رنة تخترق الخلايا ..
ولا أن تموجات شعرى تنبأ عن عبث اتخذ فى نفسى خفايا!!
صدقا .. تحيرنى التفافة اصابعك حول كفى ، كم تشعرنى بالحماية!!
رويدا رويدا .. تترافق خطواتنا ..يحركنى فضولى ..وإحساسى بالأمان
أتوق لأرى العالم عبر عينيك ...وإن كنت لست أدرى كيف .. هلا علمتنى؟؟
لم أغمض من قبل عينى .. وأترك زمام أمرى لغيرى ...سأحاول معك ولكن عدنى ...ألا تتركنى أضيع من يديك فى تعرجات الطريق .. أو أزل بعثرة فتضيق بى وتهجرنى بمنتصف الرحلة!!
وإن جبنت لحظة ...كن أنت روح المغامرة التى تنطلق بى للسعادة ...فرح من نوع جديد تماما ..كفرحة طفلة بألوان الطيف السبعة فى سماء صافية ..بعد أن اعتادت الأجواء الرمادية القاتمة للضباب...
سيعتاد قلبى دفء ابتسامتك ..وحنان عينيك ...وسيرويان ظمأ مشاعر ملهوفة لبعض من حب ...وسيفيض منها لأجلك ...ليمحى آلام انتظارك ...وستتفجر لأجلك ينابيع دافئة لتغسل همومك فى حبى ...وستتلهف شفتاى لتعلن ..كم أحبك ....ياحبيبى .

تمت بحمد الله 6\8\2009

حب من طرف واحد ....نص أدبى

الخواطر دى جزء من سجال أدبى لمجلة " تعرف تكتب خواطر ...طيب قول وسمعنا" .....كان مع " أشرف المهدى" ...بس بما انى ما اسئذنتش أشرف ..فهانشر الجزء الخاص بيا بس !!

اللذيذ فى الموضوع انى لما دخلت السجال اصلا ..كنت فاكراه سجال خواطر فصحى ..وكنت داخلة وانا قايلة انى مش هالحق مكان اساسا ...بعد ما كتبت اول مقطع اكتشفت انه سجال شعر فصحى ..بس كنوع من رفض الانهزامية ..كملت للاخر ... وعلى ذلك ...تقدروا تعتبروها قطع نثرية ..او خواطر منفصلة عن فكرة واحدة ..هى الحب من طرف واحد

وارجو انها تعجبكم ..وادى العمل

******************

على بوابة أرض الأمنيات ..دوما أنتظرك
أفسر منك كل لمحة عفوية ...بعشق متعمد... فهذه التفاتة عطف ...وأخرى نظرة اهتمام ...وابتسامة تتلون فى قلبى بلون الدفء ...
اختزنهم ذكريات تجمعنا ...وان كانت تضم عشرة غيرنا ..وان ضمت ألف ..تبهت ذكراهم جميعهم ...وتظل أنت
تنظر إلى هذه وتلك ..تبتسم لهن بدفء ...وتعاملهن بمودة ..مثلما تعاملنى ...فيثور القلب لك ...شهم هو ...يعاملهن حقا كسيد مهذب ..وينسى أنه لا يميزنى عنهن!!
فإن ثار عقلى ..هدهده الحزن ...واستشهد بأساطير حب أفناها العقل ...ولم يبق لأبطالها إلا الموت البطىء ...ربما ليس بعمر الزمن ..وإنما بعمر الألم
ويتراجع عقلى من جديد
ويترك لقلبى أثقال الحديد
من أمل زائف ونظرة لبعيد
سراب حب ، وضباب عنيد
يلفنى فى كل لحظة انتظار
احترفته حتى الملل
لما كنت أظنه حدث جلل
لعقل اتقن فنون الزلل
ولقلب أعماه الأمل
ولا يدركان لأى عمق
سيكون الاندحار
وعلام سأعلق ذنب الجفاء
خيانة قلبك لعهود الوفاء
أم لقلب سرقك فى لحظات اشتهاء
وأضع عليك كل لوم واتهمك بالرياء
فغير ذلك سيكون لى كالانتحار

***********

يا الله ...أو كنت تدرك !!!
ترانى اتمزق أمام عينيك
وتدعونى – بكل جرأة – صديقتك
أيا من كنت رفيق طفولتى وحلم مراهقتى
وعذاب شبابى ...إنى أرفضك
أرفض شفقتك ...وحزنك لأجلى
أرفض عينيك التى تلحظان ألمى
أرفض أمنيتك بقلب احتياطى
لترمم به كبريائى الممزق
سأبدد بيدى السراب ...وسأدس السم للحلم
وسأكف عن رتق خيوط الهوى ..لأدع نيران حبك لغيرى تحرقها
سأرحل ...كى لا أعذبك برؤيتى وسيف الحب يهوى على قلبى
سأرحل ...فلم يعد قلبك ولا حبك هو ما يطفأ نيران وجدى
نفيك من حياتى وحده ...سيعيد إلى ماهو أغلى من فرحى
سيرد لى كبرياء ذبحته فداءا لقلبك ...دون حتى أن أدرى
********

إنما رحيلى لترك الذكريات
لأبنى حياتى من جديد ..بعيدا عن أطلال قلبى
لم تعد حياتى هنا ...إنما بقاياى ..
هنا انتحرت أحلامى ...وتلوثت ذكرياتى بدماء حبى المرفوض
برحيلك أو رحيلى ...سأختفى من حياتك
معشوقتك هنا ..فلأجلها ابق ...اجعل منها صديقتك
لانى ساحرق خلفى الجسور ...لأحترق حتى الثمالة ..وأبعث من رمادى بقلب جديد ...لا حب فيه ...ولا أحلام ..

ابق لأجلها ..وكن لها نعم الصديق ...وابن معها ذكريات عذبة ..لتكون ذخرا لأيام تقسو وترخو بينكما ...ولتكن ابتسامتها شمس تبدد ضباب رحلتكما ...فلم يعد هذا مكانى ...
لذا فرض علي الرحيل...
وحق عليك البقاء....
*******

سنظل دوما أصدقاء
فالصداقة صدق ...ولست بكاذبة عليك
والحب -يا صديقى -...إن لم نتبادله ...
لن يصيبنا إلا الشقاء ...
وقد شقيت بحبك ..ورضيت بالبقاء
ولم تدفئك بعد ذكريات ...جعلتها جوهر حياتك
لم تلفها بمعطف يحميها من البرد ..
ووجود يحميها من الغرباء
ودفترشعر ...وألف كتاب ...
تحمل بين طياتها ملاحظاتنا ...عندما تبادلنا حولها الاراء
ورسمات بالفحم ...وطبعات ملونة ...بها خطوط بصماتنا ...
و ورود قطفتها ....لتقى يديها شر الأشواك ...وتتوّجها بها فى لحظات الصفاء ...وجففتها لتعطر أيامها بذكرى عذبة
ولم تلمها عيناك ..عندما تنسى مواعيد الدواء
لم تر فى عينيها ...نظرات حب غيرك
أو نظرات أمل ...تشتهى يوم اللقاء
فإن مررت أنت بكل هذا ...أوكنت تحتمل بالبقاء؟
و الآن ..حان وقت الرحيل ..
ولن يكون إلا فى الذكرى اللقاء
*************

هنا انتهى السجال ....بس اعتقد مش مفهوم نوعا ...وهاحط لكم لينك السجال ...على الفيس بوك

اتمنى تعجبكم يارب ...والسجال فعلا كان مميز جدا بالنسبة لىhttp://www.facebook.com/topic.php?uid=4821947778&topic=10474 وتجربة جديدة ومختلفة

هلاوس ...ومش عمل أدبى خااااااااالص

شبه اخبار قديمة :
· السيدة الاولى تتعجب من العشوائيات ومساحتها – حوالى 50 فدان- الموجودة بالقاهرة – العاصمة- وذلك فى افتتاح مشروع مساكن زينهم

· فى ذات نفس نشرة الاخبار ...اعلان عن حفلة اقيمت فى مصر الجديدة المقامة بالشارع – على الطراز الاوربى – حيث تم اقفال شارع خصيصا للاحتفال – مش فاكرة بايه بالظبط بصراحة بس تقريبا كانت احتفال بمرور كام سنة على وجود حاجة – بالمناسبة ...فى ذات نفس العاصمة!!!

· تصريح من مصدر امنى عن كون الاعتقالات هى عبارة عن وسيلة لحماية الشباب من بعض التيارات المفسدة !!!!

· وزير الداخلية ينفى تحول التحرش الجنسى الى ظاهرة فى الشارع المصرى!!

بعد كل الاخبار القديمة دى ...مش عارفة ليه حاسة انى مواطنة كوالامبورية!!!

***********

كتب * كتب
· كتاب " عايزة اتجوز" لدكتورة غادة عبد العال...كتاب مميز جدا فعلا ...جرعة الضحك عالية اوى ...على قد جرعة الواقع ومرارته ..لفت انتباهى لحاجات كتير اوى بشعة فى مجتمعنا!!
· كتاب " افتوكلايزو" للاستاذ اسامة غريب ...ومجموع المقالات المميز جدا ...واكثر ما علق بذاكرتى ...مقال " فروق ثقافية" ومقال اخر عن محافظ اسكندرية ...اؤيد استاذ اسامة فى الاول بشدة ...واعارضه فى الثانى بعنف ...
· بعد قراءتى لرواية احسان عبد القدوس " ونسيت انى امرأة " و مسرحية " لا أستطيع أفكر وأنا أرقص" ...سؤال واحد بس بيتردد فى دماغى ...هو إحسان عبد القدوس ..قعد فى الاعتقال كام سنة؟؟!!!!
· بعض الأعمال الأدبية ..بتحسسنى بغبائى بشكل مش طبيعى ...بس اكيد يعنى كل الكلام المكلكع ده له معنى عميق ..اعمق من فهمى السطحى للأمور !!
· روايات كتير قراتها فى الفترة الاخيرة ...وقصص قصيرة وأشعار ..وكلها فتحت عيونى على حاجات كتير ..وان كانت بسيطة اوى ...بس لها عمق كبير اوى
******

مواقف ...وجدل بيزنطى:
· اتعرفت على ناس كتير فى الفترة الاخيرة ...ناس جميلة وشخصيات عسولة اوى اوى ...بس لو اقتنعوا انى لا باحط صورى على ماسنجر او فيس بوك ..ولا بادى نمرة تليفونى لحد ماشفتهوش قبل كده وجها لوجه ..من غير نقاش او جدل ..هتبقى الحياة اجمل بكتير
· الحب احساس تلقائى ...ماينفعش نجبر حد عليه ...ولا نخطط لحد انه يحب حد ...لان لو ماكنش جوه الطرفين استعداد للحب ده ...يبقى اهلا بيك فى دنيا العذاب ....وفى دى برده ياريت بلاش جدل بيزنطى!!!
· مجرد اقتناع بعض الناس بقناعات معينة ...مش معناها انها فرض عليا ...مهما كان قرب الناس دول منى ...
· الرقابة ..الاوامر ...لعبة السلطة ...رفضتها وانا عندى 7 سنين ..فما اعتقدش بعد مابقيت 21 سنة ..هاقبلها من حد ...اللى اتعود يكون رقيب نفسه ...وواضع معاييره ...بتشنقه معايير غيره!!
· لمجرد انك ساكت ....بعض الناس بيفتكروك امعة!! ...ومش بيحترموا نفسهم الا لما تثبت لهم انك ممكن توصل لاسفل درك من البذاءة لو طلبت معاك!!!
· زى ما ضربت فى دماغى اجيب دبدوب كبير ...وانى اتعلم عزف على الاورج ...ضاربة فى دماغى دلوقتى اجيب سارى هندى....شوية جنون لا ضرر منه اطلاقا ...مش كده برده؟
· جرح بينزف ...وصوت بكاء ...وألم بس مش بيتحس ...ازاى ما اعرفش ...بس بين الضلوع حاجات كتير غريبة بتحصل!!!
· احداث كتير بشعة بتحصلى ...ولناس غاليين على قلبى جدا ..- يعنى بتحصلى برضه- ....يارب يفك كرب كل مكروب ...ويهدينا للصواب جميعا يارب ..
· بس لطف ربنا ورحمته واسعين اوى ...احداث كمان جميلة بتحصلى ..وبتبين قد ايه ممكن تفاصيل بسيطة وصغيرة اوى ورمزية ...بس تفرق كتير اوى فى نفس الانسان
· بعد شوية الاكتئاب اللى فوق ...نجيبلكم خبرين حلوين ..كفاية كده غم يعنى ...اول واحد ...انا نجحت يا رجاااااااااااااااااااااااالة ...ويا بنات برده ..احنا لينا غير البنات يعنى!! ..ولأول مرة فى تاريخى الجامعى المنيل بنيلة ...نجحت صافى ...ومش معايا ولا مادة!!! بس مش معايا التقديرات لسه ...اول ما الفضايح تظهر كاملة ...هاسيحلكم ...وممكن لا ..على حسب حجم الفضيحة يعنى
· تانى حدث ...كسبت صديقة جديدة ...انجى ابراهيم- صاحبة مدونة هات من الاخر - انوج العسولة ...بنوتة زى السكر ...وقلبها رقيق اوى اوى ..وبتدى اشراقة خاصة بيها لاى حدث بيحصل .... رحت معاها فى احلى فسحتين حصلولى من زماااااااااان اوى اوى ....يارب يخليكى ليا يارب ...ونفضل اصحاب دايما ...وأكون عند حسن ظنك يا قمراية \ على فكرة ...هى لسه ماعرفتش انى مجنونة رسمى ...بس ماتقلقوش ...هتشوف بنفسها بعدين!

******

أسرار حربية ...اللى بيقراها بنقتلوه- عشان نبقى واضحين من الاول يعنى
· ماما ....وحشتينى أوى ...تفاصيل كتير كانت بينا وحشتنى ...ملامحك ...صوتك وانتى بتقوليلى – حبيبى يا متغرب – لما باكون لوحدى ...وحشتينى أوى ....فى حاجات كتير اوى ...بس ما أقدرش أقول غير ...ربنا يرحمك يا أمى ...ويبدلك دار خير من الدار ...وأهل خير من الأهل
· جدى ....وحشتنى أوى أوى ...ووحشتنى ابتسامتك لما باضحك لك ....ونظرة الحب اللى فى عينيك ...و وجودك اللى كان بيواسينى فى حزنى ...كان يكفينى اوى انك معايا فى نفس المكان ..تفاصيل كتير برده جمعت بينا ...غالية اوى اوى على قلبى ...عشان انت دايما فى قلبى ..الفارس الوحيد ....يارب يرحمك يا جدى ...ويبدلك دار خير من الدار ...وأهل خير من الأهل
· جدتى ...طال فراقنا أوى ...سنين كتيرعدت ...بس عارفة ...مش عارفة ليه دايما لما بافتكرك ...بافتكرك وحواليكى هالة نور ...وباتحسر أوى على أيام وجودك بينا ...وحشتينى أوى ...ووحشنى جو الاحساس بالأمان والحنان والحماية ...واحاسيس كتير اوى صعب اوصفها فى كلام ...ماينفعش بس غير انه يتحس بيها ...ربنا يرحمك يا جدتى ...ويبدلك دار خير من الدار ...و أهل خير من الأهل
أهلى ...وحشتونى اوى اوى ...يارب يلم شملنا فى الجنة يارب ...ويخفف عنى وعن كل اللى وحشتوهم زيى فراقكم ...ويجعل مثواكم الجنة يارب ويرحمكم برحمته الواسعة