كشّر ...كده كده الصورة هتطلع حلوة

اللى يعرفنى من زمان يعرف انا قد إيه بأكره إنى اتصور ...وده بيرجع غالباً لإعتقادى إنى صورى دايماً بتطلع وحشة جدا ...اوحش منى فى الواقع ...واللى هو انا اصلا مش نيكول كيدمان فى الواقع يعنى!

واللى يعرفنى دلوقتى هيلاقينى باتصور فى اغلب خروجاتى...واوقات باتصور من غير خروجات ومن غير اى حاجة خالص.  ...رغم إن فى اوقات بابقى كارهة اتصور جدا..بس باتصور .

عندى على اللاب مايقرب من 10 آلاف صورة تقريبا..أكيد مش كلهم تصوير طبعا وكتير منهم متاخدين من الانترنت ...بس اعتقد ما لايقل عن ألف صورة متصورين موجودين .

وطبعا فى محاولة إنى ألاقى صورتى بالبلوفر البمبى اللى رباب عاملهولى وسط الصور عشان اوريه لطنط إيمان ..كانت محاولة فاشلة تنين..ودخلنا فى البومات وذكريات كتيييييييييير جدا ولقيت طنط إيمان بتقولى " إنتى عايشة حياتك " ..ورحنا قفلنا الصور يائسين على وعد داخلى منى لنفسى إنى هأصور لها البلوفر صورة لوحده

صور مع أصحابى فى فطار رمضان..صور مع صاحباتى فى الترام ..صور مع رشا فى البيت..مع أول هدية جاتلى من شلة أصحابى "الإخوة الأعداء" فى حياتى..وأول حفلة مفاجأة..-والأخيرة فى الواقع-

صور حفلة عيد ميلادى اللى رشا عملتهولى..والبالونات الحلوة قوى قوى ..صور صاحباتى سوا وانا حتى ماكنتش معاهم اصلا .

صورى مع هيام لما كانت فى إسكندرية والفيديو اللى بتفرج عليه كل فترة ..وصورنا فى القاهرة

صور كتييييييييييييير قوى قوى قوى ..كمية ذكريات مهولة وغير طبيعية ومتسجلة بالألوان الطبيعية  ^_^

صور لناس علاقتى بيها اتقطعت مع الزمن...بس الصورة سايبة علامة حلوة معاهم

صورة ليا غيرت مسار ملامحى فى مرحلة صعبة ..وصورت غيرت مسار حياتى نفسها

صورى فى التدريبات والمؤتمرات .

فى فرح منى صاحبتى  من كام شهر ..انا كنت حاسة نفسى بشعة جدا ..لدرجة إنى مكنتش حابة اتصور معاها عشان ما احسش انى بوظت جمال لحظتها ب إحساسى المريع ده ...ده غير طبعا إنى أساساً بخاف من الأفراح والمناسبات الاجتماعية العائلية بشكل بشع..ومش بحضرها إلا فى أندر الحالات ..ولولا غلاوة منى ماكنتش حضرت .

فى فرح رشا أختى..جالى نفس الهاجس بالظبط ...وكنت هاهرب من الكاميرا فى أول لحظة حسيتها بتيجى عليا زى عادتى ..بس افتكرت عشق رشا للصور – بتصور بمعدل صورة كل 3 ثوانى -_-

و افتكرت إنها لو مالقتش صور ليا فى الفرح غالبا هتسلخنى حية وبعدين تمثل بجثتى بعد ماتقتلنى !

فى فرح رشا اتصورت كمية صور مهولة ...ومع كل الناس تقريبا ..رغم إنى معرفش شكلى عامل إزاى أصلا ومابصتش فى مراية من ساعة ماسبنا الكوافير وطول الفرح وانا ماقعدتش تقريبا..وبالتالى أكيد فى حاجات كتير ضربت فى شكلى

والأغرب إنى نزلت الصور كلها...اللى شايفة ان شكلى حلو فيها واللى لأ

فى لحظة معينة اتكسر هاجس الشكل الوحش جوايا ..وبقا مش فارق عندى ....هوس الكمال راح..وبقا فى عشق للحظة الحلوة .

من كام سنة فى فورمات عقيم مات الهارد اللى عليه آخر صور لأمى الله يرحمها ..ساعتها كرد فعل عكسى ضحكت كتير قوى..ضحك بحسرة ..وقلت إذا كانت هى راحت..جت ع الصور يعنى!

بس دلوقتى..اوقات كتير قوى قوى..بيبقى نفسى اتصور معاها...وكل ما اتخنق او اتضايق..افتح صورنا وابتسم..حتى لو ابتسامة مليان دموع الاغتراب ...بس على الأقل أقول كنا هنا سوا..واحتفلنا فى اللحظة دى سوا..او عيطنا فى اللحظة دى سوا .

الموضوع ببساطة إنى اكتشفت إنى مش محتاجة أكون حلوة أو سوبر ستار أو فوتوجينيك زى سعاد حسنى ..عشان أتصور وأسجل اللحظات الحلوة – أو حتى الصعبة – فى حياتى .

اكتشفت إنى محتاجة احتفظ باللحظات دى من حياتى ..عشان أحس قد إيه انا عشت حياتى .

وفى يوم من الأيام..هاطبع من الصور دى اللى اعلقه على لوح خشب على الحيطة قدامى ..واحاوطه بالالوان والبهجة والدلع..واللى هاحتفظ بيه فى "سكراب بوك " من تصميمى ..واللى هاطبعه واحطه فى ألبوم ...واللى هالغيه .

ماتيجوا نتصور سوا بقا ^_^ 

الهدوم القديمة والراحة

رغم إنى نشيطة جدا على الفيس بوك ..إلا إنى مابقيتش بأحسه مريح
ودايما حاسة إنى المفروض اكتب هنا..واتواجد هنا ...واكب كل اللى فى قلبى هنا

رغم هجرى الطويل للمدونة..ورغم بعدى عنها لفترات طويلة وقلة المشاركات
إلا إنى باحسها عاملة زى الوطن...متواجدة فيه وبافكر فيه ..رغم الاغتراب والغرابة

هى بيتى اللى بنيته صورة صورة وكلمة كلمة ..وحاوطت نفسى بيه
هى جزء منى ..وجزء باحبه وبيعبر عنى رغم سذاجة حاجات كتير فيه

واكتشفت إنى أحياناً كتير بأكرر نفسى قوى ..وانى حياتى عاملة زى الدايرة
واكتشفت إنى محتاجة استكشف نفسى من أول وجديد...ولقيت هنا هو المكان اللى هالاقينى فيه انا ...بعيد عن التوترات والصراعات والقريفة والأفورة والناس الكتير ومحاولة التأثير فى الناس دى..هنا مكانى انا وبس ...محيطى المألوف الحبيب

مدونتى...انا بحبك ^_^ 

تفاصيل 1- حضن

** " انا عايزة اتجوز بس عشان اتحضن "

سلمى - أحلى الأوقات

وردت عليها يسرية إن الحضن هو اللى بيخلى الست تحس إنها ست فعلا .

** حواء اتخلقت من ضلع آدم...يعنى اتخلقت حاضنة قلبه وبيحاوطها لحمه ودمه وايديه .

**الحضن اللى بجد هو إنك مش بس ايديك تضم شخص او ان ضلوعك تمس ضلوعه

الحضن الحقيقى هو إن كل الحواجز النفسية اللى بينك وبين الشخص ده بتسقط ..إن حجرات قلبك نفسها تكون مكشوفة للشخص اللى بتحضنه 

وعشان كده مش اى شخص بيعرف يحضن او يتحضن حضن حقيقى يشبع

**" طفلى العزيز ..أتمنى أن تجد من يحتضك لعشرين دقيقة كاملة متواصلة ..فقط يحتضك..دون أن يحاول تقبيلك..دون أن ينظر لوجهك "

The waitress  على لسان كيرى راسل البطلة

**عند قدر معين من البؤس الحضن يكون مقدمة لعملية ميكانيكية فاقدة للمعنى والإحساس..لا معنى له على الإطلاق

يصبح من الصعب جدا جدا ان تسمح لنفسك ان تُحتضَن ..ان تُخفض كل الحواجز التى بنيت بطول العمر والمعاناة

عندها تصبح أعظم أمنياتك حضن..حضن طويل يدوّب طبقات الهم اللى غلفت القلب من كل اتجاه وتسمح له إنه يتنفس بحرية ويعرف يحس

**يمكنك أن تحتوى آخرا ً ..ليس كما ينبغى فلا عطاء مكتمل بغير أخذ ..الحنان له وجهة مزدوجة وصعب قوى يكون احادى الجهة  وإلا يكون استنزاف

**إن روحك تتحاوط وتحتوى بحنية ..إن قلبك يتطمن ويستكين

إنك ترتاح ببساطة بين ايدين إنسان وعلى دقة قلبه ..

حاجة كده عاملة زى تعشيقة الخشب فى بعضه

**فى ناس طبطبتها حضن

وناس حضنها غربة

** أحلى حضن فى الدنيا هو حضن الاطفال ..لما يجروا عليك ويترموا بين ايديك ويرتاحوا على دقات قلبك

** الدبدوب هو وسيلة لاحتضان ذاتك..دفاه بيتاخد من حرارة جسمك ..و تفاعله من محاوطة ايديك له..وعطره بياخده من حضنك..وصمته الأزلى بيغرى بالحكى الآمن

حنية الإنسان على نفسه مهمة جدا ...خاصة لو ماكنش عنده غيرها

هكذا يصبح موتى مدهشاً

إلى الموت :
إحنا أصحاب من زمان قوى ..بشكل مبالغ فيه وشبه مبتذل يعنى 
والسنة دى الغزل مابينا كان عنيف شويتين ..يمكن أكتر حتى من السنة اللى اتقفل باب الترام على ايدى و كان هيمشى بيا 
بس انا فعلا مش عايزة أموت محروقة -..آه بأدعى بالشهادة من وانا عندى  7 سنين تقريباً ..بس الموت غريب شهادة 
وانا عايزة أموت فى الحرم ..وياريت يكون بعد ما أحج بقا ^_^
مش بعيدة على ربنا ..و واثقة انه هيحققهالى بإذن الله
فبلاش غزل من النوع ده تانى الله يسترك ^_^ 


عن توابع الموت :
فى الأول كنت عايزة كل الناس تفتكرنى بالخير بعد ما اموت ..بابتسامة او ما شابه
حاجة تشفع لى عند ربنا إنى حاولت أكون إنسان صالح
حالياً أفضل النسيان المطلق ...و ثقتى فى رحمة ربنا سبحانه وتعالى 

الجنازة...عايزة الناس توزع آيس كريم وحلويات وممكن حوادىء-- تبعاً لمنطق لم علينا عبيدك يارب - ..وياريت لو يحضره أطفال كمان ..بس فهموهم إن الموت مش مدعاة للحزن ...فهموهم إن الأرض بتضم بعضها ..وإنى جزء منها ورجعت لها..وإن روحى رجعت للسما فى مكانها اللى ربنا اختاره لها...ومش عايزة كآبة ومش عايزة حزن وزعل 
الموت هو الحقيقة الوحيدة ..واليقين المُدرَك لنا كلنا ..مافيهوش حاجة تزعل أصلاً 

العزاء بقا ..اللى هتيجى بأسود..يبقى سواريه سان بروتال ..غير كده انا مبحبش اللون الأسود فى العزا -ممكن فى اوقات تانية عادى- ...عايزة ألوان مبهجة هادية او فواقع بيس يعنى ..وتعملوا أكل وتتلموا سوا ...وتفتكروا لى المواقف المسخرة وتضحكوا ...هى مش ناقصة اكتئاب ..كده كده حياتكم زبالة ومش ناقصة تزبلوها بعياط وقهرة وكلام فارغ على أمر واقع وماشى ع الكل فى اى وكل وقت يعنى ! 

وتقسموا مابينكم ختمة للقرآن ليا بحيث إنه أول وقتى فى القبر دعواتكم وقرآنكم يوصل لى :)

ولما اوحشكم قوى....زوروا أى دار أيتام  واقعدوا مع الأطفال...احضنوهم وضحكوهم وطبطبوا عليهم 
ألم الوحشة هيخف قوى ..والسلخ اللى هتحسوه من الفراق هيتداوى كتير ^_^ 

وطبعا يعنى ..خلى بالكم على إخواتى ..هيبقوا زعلانين بشكل مبالغ فيه ...انا عارفاهم المنطق مش بينفع معاهم فى الحاجات دى !

خليكم معاهم على قد ماتقدروا ...ولو ماقدرتوش معلش..انا واثقة إن ربنا مافيش أحن منه عليهم 

بالمناسبة ...مش عايزة صوان للعزا والكلام الفارغ ده ..مش هيبقى موت وخراب ديار ..ومش هاستفيد حاجة انا بالكلام ده ومش باحب العنجهيات اللى من النوع ده..العزا فى البيت وانجزوا ..او فى مدخل العمارة 

وعايزين تعملوا تجمع ..خدوا اخواتى فى جونينة عامة واعملوا وليمة فى العراء احتفالا إنى خلعت :P 


و كل ماتفتكرونى ..ادعوا لى ..وابتسموا 

ويارب يستجيب ويتقبل ..ويرحمنى ^_^

بس كده..ده الكلام لحد دلوقتى 

ويارب يحسن ختامى ويجمعنى بمن أحبهم فى الجنة يارب 

27-8-2013

الساعة 4.10 صباحاً 

شخابيط ..شبهى

نبتدى اولها يعنى ايه بين ضفتى عقل

ببساطة عملت اسم المدونة كده..لأنى بالظبط عاملة زى المركب اللى بيتمرجح بين العقل والجنون ..والمدونة دى هتلاقوا فيها الاتنين...عقلى وجنونى ومشاعرى

اللى يعرفنى كويس هيلاقينى شخص مش بيعرف يتكلم كويس...شخص صامت اغلب الوقت..شخص بتلجأ له عادة فى وقت صعب عشان تفضفض له..لأن تواجده غالبا مريح..ومش بيتكلم كتير..وكمان ممكن يديك حل عقلانى منطقى ..او يتهبل معاك عشان تروق ^_^

الفترة اللى فاتت حصل حاجات كتير قوى قوى...على المستوى الشخصى والنفسى والعملى وعلى كل مستوى ^_^

اخدت كام قلم محترم - مشيها قلم - من اللى بيلسوعوا قوى بصراحة

ناس كنت فاكراها اجدع ناس..وطلعوا مش احسن منى فى حاجة

المرة دى انا هأرغى عنى شوية 

انا مييييييييييييييييييييييين

ببساطة انا مش عاقل ولا مجنون...انا اختك وبنتك وبنت الجيران ..شخص انت تعرفه من زمان...وبتحب ابتسامته وبتخاف عليه كمان 

انا شخص حزين قوى قوى...وبيحب الضحك قوى قوى..وبيكره النكد عمى وبيعتبره عدو شخصى !

خوافة قوى قوى وضعيفة قوى قوى...بس اقوى منك 

رخمة جدا جدا..ولمضة جدا جدا...طبقا لأراء اصحابى الولاد...ده لو اساسا اضافوا تاء التأنيث واعتبرونى بنت من اصله يعنى :D

باحب كل حاجة فى الدنيا...وشايفة لها معنى ودلالة 

ومش باحب اى حاجة خالص..ساعات كتير

باحب البالونات والفراقيع والاطفال

وباتكسف بغباء...حتى من صحباتى البنات..حتى من الاطفال

اتعلمت احلم...واول حلم ليا كان انى يبقى عندى بيت كبيييييييييير...ويبقى مليان اطفال...الأيتام واطفال الشوارع ...ونلعب مع بعض كتير جدا...ونتعلم ونضحك ونهزر ونغنى ونرقص 

ويبقى عندى جريدة خاصة كل شهر..هى مجلة..تتوزع مجانا ..واعمل ندوات كبييييييييييييييرة 

انزل فيها للستات اوعيهم بحقوقهم...كلها على بعض..أسرية وزوجية وانسانية قبل اى شىء...يعنى إيه تكون انسان 

ايه واجباتها وايه حقوقها..وازاى تقدر تاخد حقها

باحلم انى اتعلم بيانو وجيتار..وجمباز ايقاعى -امنع الضحك فى الفصل..عيب تتريقوا على فكرة :P

وعايزة اتعلم الرسم كمان 

وعايزة اسافر كل بلاد الدنيا

وعايزة اروح اقعد مع هيام - نص قلبى اللبنانى- قد مليون سنة كده ..عشان لما ابعد عنها ماتوحشنيش قوى زى ماهى وحشانى دلوقتى

عايزة اتفسح مع صحباتى كل يوووووووم...

وعايزة ارغى معاهم كتير قوى..مع انى حاسة انى مش قادرة ارغى ولا اعمل اى حاجة 

عايزة اتجنن شوية كتيييييييير...وعايزة اخد الدنيا بالحضن قوى قوى ..واقولها

هأ هأ ..ماراحتش عليا ياحدقة :P

ورجعت تانى

وحشتنى قوى قوى الكتابة..و وحشتنى المدونة..بيتى المهجور اللى الفراق عنه صعب...وفى نفس الوقت الرجوع له صعب
فى لحظة معينة كان صعب قوى ارجع اكتب بروح قوية زى الأول..بعد كل اللى حصل...اكتب اقول ايه؟!


اكتب عن الثورة؟!اقول ايه
اقول مات فلان وفلان وفلان وماجاش حقه؟!
اكتب عن قبل الثورة وقد ايه ماتوا وبرده ماجاش حقهم؟
اكتب عن بعد الثورة وقد ايه ماتوا وماجاش حقهم هما كمان؟!
اكتب عن الأخلاقيات والقيم والكلام الحلو 
اكتب عن الشخصيات اللى باحبها
ولا عن الناس اللى كانت قريبة قوى وبعدت ..وسخفت 
ولا عن الناس اللى رجعت وجرحت؟!
ولا اكتب خواطر رومانسية وانفصل عن كل ده طالما مافيش حد يستاهل


طيب اكتب عن شغلى بما انى باحبه؟!
ولا اكتب عن الناس اللى لاقيتها كلها لوحدها قوى شرقانة على ابتسامة وكلمة شكرا؟!
ولا عن شوق الناس انها ترجع تتلم على حاجة حلوة!؟


اكتب عن امى الله يرحمها 
ولا عن استاذتى اللى باحبهم وعلمونى
ولا عن الشخصيات اللى علمت ونقشت على حجر عقلى وقلبى !
ولا عن ايه ولا ايه!


كل ده بقيت فى لحظة حساه من غير معنى ومن غير هدف..لما لقيت اللى بيموت بيموت من غير دية وبيتخون 
كل ده ممكن يتقال فيه كلام يملى كتب ومدونات وعقول ..
بس كله ماكنتش حساه فى وقت..وخايفة اطلعه فى وقت...وحاليا مش عارفة 


حاليا اخدت قرار...زى ما ابتدت المدونة دى عشان اكتب اللى انا عايزاه..هتكمل برده عشان اكتب اللى انا عايزاه..مدونتى وهتبقى شبهى ...مضروبة فى خلاط مسعور ! 


بس احب اقولكم...وحشتونى قوى قوى قوى بجد
و وحشتنى الكتابة قوى


ملحوظة ...انا ناوية اغير اسم المدونة اصلا ..قريب جدا
بس امتى بالظبط مش عارفة ^_^

يوم التحرش ...انت تتحرش اذن انت موجود

كتبت قبل كده بوست عن التحرش وكان شبه الدراسة اصلا والمفروض كان له جزء تانى ولسه ماتكتبش بما إنى كاتبة كسولة جدا وبايأس بسهولة اصلا !!

بس المرة دى الكلام بعيدا عن الكلام الموضوعى التقليدى اللى هو سمة المدونة بشكل عام

أصل الواحد هيتكلم عن تحرش مين بمين بالظبط ॥تحرش الولاد بالبنات و وجهة نظرهم ان كل البنات ॥نمشيها قلالة الأدب ॥ولو ان الفاظهم اقسى واحقر بكتير !
ولا فى البنات اللى بتعاكس الولاد من باب التسلية॥او من اى باب تانى ما اعرفهوش بصراحة

ولا فى البنات اللى بتعاكس البنات ...ومن باب الحقد بيشدوها من شعرها وبيبهدلوها آخر بهدلة

طيب نتكلم عن نظرة المجتمع للولد اللى مش بيعاكس بنات على إنه ولد مش طبيعى ॥ومشكوك فى أمره

ولا نتكلم على نظرة المجتمع للبنت اللى بيتأخر جوازها ॥او اللى مش بتتجوز ...- اه ماهو ده يعتبر تحرش برده ...من وجهة نظرى على الأقل يعنى!!

طيب نتكلم على جلسات النميمة البناتى اللى بنجيب فيها سيرة بنات و ولاد ॥بكل أنواع الخير والشر...مش بيسلموا سواء بلفظ او تلميح ...وعادة بيكون تلميح وكلام قبيح ॥الصراحة واجبة برده ياجماعة॥ماينفعش اكدب عليكم

طبعا المفروض اتكلم عن حقوق المرأة واننا المفروض نصونها لإنها جوهرة وهى اللى بتربى المجتمع ॥وان ست مش متربية معناها مجتمع قليل الرباية ...

بس يعنى لامؤاخذة اشمعنى المرأة هى اللى هتاخد حقوقها॥اذا كنا كلنا مضروبين بالجزمة...رجالة وستات واطفال وحيوانات ...البحر والنهر والصحرا والمبانى نفسهم ضاربينهم بالجزمة....

المرأة نصف المجتمع...بس لما يبقى المجتمع كله متحرَش بيه ...يبقى لازم المرأة ماتاخدش مكانتها॥طالما الإنسان مش واخد مكانته الطبيعية

ادى للإنسان حقوقه الإنسانية॥وتلقائيا المرأة هتاخد مكانتها كإنسان تدريجيا هتكتسب مميزات مكانتها كأنثى ॥

ثم يعنى البنى آدم مننا آيه غير شوية تحرشات فوق بعض

100 يوم على الثورة ..

المجلس العسكرى قدم للشعب فى بيانه على الفيس بوك تهنئته بمرور 100 يوم على الثورة

مر على ثورتنا 100 يوم ...وعلى ثورة تونس الجميلة اكتر من كده شوية ...

انجزنا كتير فيهم ....بس لسه انجازات كتيرة قوى محتاجة تتم

وللأسف حاسة إننا قوتنا بتتشتت وبنرجع لورا...سواء مصر سواء تونس!!!

وماينفعش إن قوتنا تتشتت على فكرة...ماينفعش إننا نخون بعض...ماينفعش غير إننا نكون واثقين من الأرض اللى واقفين عليها على قد مانقدر...ماينفعش غير أننا نلم بعضنا على أحسن فكرة لحد ما ناخد حق الشهداء وحقنا ...

ركزوا على الأهداف الأساسية ...ركزوا عليها لحد مانحققها..وبعدها نحقق الأهداف الفرعية

الأهداف الأساسية..........تحقيق العدالة........الحرية الحقيقية .............باختصار..وطن نقدر نعيش فيه بكرامتنا ونلاقي فيه حلمنا ونقدر نحققه ...عشانه وعشاننا :)

ولازم عشان ده يتحقق ...يكون الشعب إيد واحد .......الشعب لوحده يقدر يعمل كتير أوى...من غير شعب مافيش دولة ....وابسط مثال دولة ميدان التحرير :)

فى الميدان الناس عملت دولة على مزاجها وبراحتها....وكانت أحسن ما فينا ...ونقدر نرجعها تانى...لما الشعب يبقى إيد واحدة

الطائفية ..والثورة ..والهبل

مصر بعد 25 يناير ....زى مصر قبل 25 يناير على فكرة ...كل اللى حصل فرق صدمة ...وتوجيه الحماسة فى تنضيف الشوارع بدل الكتابة على الفيس ..وإن شوية رءوس فساد اتمسكت !

لكن كتغيير جذرى...ماحصلش ..هو بس فرق صدمة!

إذا كانت أمن الدولة هى اللى فجرت كنايس والحسين وعذبت سلفيين وإخوان ...فهى كمان عملت تغيير فكرى فى الناس على مدار 30 سنة مش هيخلص فى شهرين..خلينا صرحا شوية ...لسه الناس بتبص للمسيحيين على إنهم مختلفين عننا ...ولسه بنبص للإخوان والسلفيين على إنهم إرهابيين متخفيين !!

بس الكلام ده مش من أول إمبارح بليل على فكرة...الكلام ده بقاله كتير أزيد من اللازم...ولو كان المتطرفين منهم معاهم سلاح..كانوا خلصوا على بعض من زمان

يبقى بلاش فتى واستهبال..وكل ما تحصل حادثة نقول فتنة طائفية..اعتقد باين أوى يعنى إن على الأقل 95% من الحوادث اللى بين المسلمين والمسيحيين كانت شغل أمن دولة...ولا هى الناس هتجيب السلاح منين؟!

ولو كانت ناس فعلا اللى جايبة سلاح يبقى برده غلط على أمن الدولة..ولا هى فالحة بس تراقب الناس فى الفنادق وفى الحمامات وسايبة السلاح داير فى البلد ؟!

بس دلوقتى الوضع مختلف...لو كل واحد ماحكمش عقله ..وافتكر انه بيدافع عن دينه ضد عدو ...يبقى هنضيع !

لازم الكل يفهم إن ده وقت نحكم جوهر أدياننا ...اللى هى إصلاح الأرض ..اللى هى اننا نبنى البلد..وندى لكل حاجة حجمها و وقتها..مش وقت تركيز فى كلام أهبل ...لانها مش ناقصة هبل..ولو صبرنا على الهبل وسكتنا ..احنا مش هنجوع بس زى الاضرابات الفئوية..لا ده احنا هنسحل بعض قبل ما نتسحل على المستوى الدولى ..وبدل مانبنى مستقبلنا...بندبحه ونردم عليه بأوسخ تراب ممكن...تراب الغباء والتعصب والجهل ...

مش هاقلكم غير افتكروا انتوا مين كويس ...افتكروا ان وقت الشدة الحقيقى معدنكم الحقيقى ظهر وبقيتوا واحد بجد...و وقت الشدة لسه ماخلصش..بالعكس دلوقتى اشد واخطر ...

وزى ما ابهرتوا الدنيا كلها وخليتوها تحلف بيكم يا مصريين ...ماينفعش تغلبوا التراث الغبى اللى سابوه لنا يتحكم فينا...وبدل ما يبقى أثر الصدمة ..المفروض نحوله لعادة عندنا ...ونحول طاقاتنا لمكانها الصح ..اللى ربنا خلقنا عشانه ...إننا نعمر أرضنا ونبنيها صح ..بداية من عقولنا ...لحد بيوتنا

عن الثورة ..اللى مع واللى ضد ...وانا وانت ..وحسنى برررررررررررره

انصر اخاك ظالماً او مظلوما

جملة قالتها لى أمى الله يرحمها فى وسط نقاش ...وفهمتنى وقتها إن نصرة المظلوم بمساندته ونصرة الظالم بإنك توقفه عن ظلمه ... واعتقد انها مقتبسة من حديث شريف او من كلام حد من الصحابة أو السلف الصالح ॥مش متذكرة بالظبط بصراحة لإنه من زمان جدا

الاول ندعى لاخواتنا فى ليبيا ربنا ينجيهم وينصرهم ॥ونشوف عدل ربنا فى القذافى
و ده مقال ضرورى تقروه

ودى نوارة بتقول رأيها

و ده إهداء منى لكل الناس ॥سواء عايزة تنزل أو لأ ...هدية بقا :)

بداية عشان نكون على نور وبينة من الأول ...انا من مؤيدى ثورة 25 يناير ...من يوم 24 يناير ...كان عندى أمل رهيب وكنت متفائلة بشكل غريب...بس مش لدرجة انهم يخلعوا الرئيس بصراحة ...بس كنت فرحانة ...اهى على الأقل محاولة لرفض الظلم والبحث عن حق ...واللى بيدور على حق عمره مابيضيع...لأنه ربنا اسمه الحق وبيساعد كل اللى يرفض الظلم ويؤيده بنصره ولو بعد حين
فى لحظة معينة فقدت ثقتى فى حكم الثوار و وعيهم ...واثبتوا لى قلة وعيى وجهلى لما قلت يرجعوا...اثبتوا لى يعنى إيه حق ماينفعش السكوت عليه...يعنى إيه إن التفاوض ماينفعش فى حاجات مهمة أوى زى الدم ...زى الكرامة ...زى عزة النفس والآدمية - أيوة الآدمية زى ماقراتها!- بس برده كنت بادعى لهم من قلبى لأنهم ناس كريمة وبتدور على حق ॥وبدل ما ادعى لهم ربنا يؤيدهم بنصره॥بقيت بادعى ربنا يهديهم ويسدد خطاهم ويحميهم ويردهم سالمين...والحمد لله ربنا نصرهم وشالوا حسنىىىىى :D

طبعا وقتها المناقشات كانت من ناااااااار سواء على الفيس سواء وسط أصحابى॥منهم ناس شككت فيا بما إنى مؤيدة ॥ومنهم ناس اقتنعت بوجهة نظرى ॥ومنهم ناس اقنعونى بوجهة نظرهم إلى حد ما ॥بس من باب إنى مش من حقى أفرض على إنسان إنه يضحى فى سبيل إختياراتى ॥وإنه يعانى ولو معاناة مادية يمكن تعويضها بسهولة ॥فى سبيل قضية أنا مؤمنة بيها وبأهميتها ॥قبلتها على مضض وللأسف كان اليوم الوحيد اللى اتسمح لى بيه -شكلياً- إنى انزل مظاهرات وقعدت ॥ورجعت اصلى وادعى واعيط وصحتى تبوظ- ده نشاط يومى ثورى عادى بالنسبة لى على فكرة -
بس لحظتها اخدت من جوايا قرار محسوم بالنسبة لى وماعنديش نية أرجع فيه إنى زى ماسبت حقى فى عهد مبارك وخليته يحولنى لمسخ سلبى مش قادر يرفض الفساد ولا قادر يعمل شىء وكل السلطات فى إيديه ...إنى هاسيب الناس اللى ضحت بحياتها علشان حقوقى تاخد كل الإجراءات اللى هى شايفاها صح ...وهارضى بأى عواقب ناتجة عنها مهما كانت ॥ سواء السواد اللى الرافضين توقعوه॥أو النصر اللى الثوار توقعوه ...
أصل مش منطقية يعنى إنى أقبل نظام مبارك بفساده بقذاراته وابقى فيه معدومة الكرامة ...وآجى عند اللى بيدوروا على كرامتى واتنطط عليهم ॥وبعد ماجابوا لى فى الأول شوية حقوق ॥وبعدها شوية حقوق॥اقولهم ميرسيه ومع السلامة ॥واحولهم لما يرفضوا لخونة وعملا واجنداتية !

توقعت بسذاجة إن بعد تنحى مبارك وإن الكل فرح.. إننا هنتجمع -ماعدا أنصار الحزب الوطنى وبابا حسنى والعاطفيين- ونتفق كلنا ...والاتهامات خلاص بقا...العالم كله أصلا بقا معانا !
سذاجة بعيد عنكم وهبل ॥لقيت ناس شايفة إن الثوار اتحولوا لطغاة وديكتاتوريين مش قابلين للنقاش ॥واتقالت لى شخصيا لما حاولت اتناقش إننا مش بنتناقش لأ إحنا بنحدف كلام ومش واعيين ومخربين وفوضويين ومفسدين ...فلة شمعة بالكهربا يعنى
كل إنسان حر فى وجهة نظره وفى التعبير عنها ॥طالما مش إهانة وطالما مؤيدة بدلائل منطقية ॥وطالما هدفنا كلنا مصلحة مصر بلدنا ॥إننا نبنيها صح وتبقى أحسن ॥ونحافظ على اللى عملناه ومانضيعش حق الشهداء ॥والأحياء ...يبقى فعلا إحنا داخلين على مرحلة رائعة ...والحياة هتكون أفضل بإذن الله طالما فيه فكر بيدور بين أهل البلد عشان تبقى أحسن

بالنسبة لى كـ ريم وجيه ...أنا مع النزول النهاردة فى مظاهرة مليونية فى كل محافظات مصر ॥عشان نؤيد مطالبنا ونحطها فى صيغة أكثر وضوحا ...وعشان نعترض على المظالم الصارخة اللى حصلت بعد نزول الشرطة فى الشوارع وتصرفاتها المشينة ॥

أنا مع النزول فى المظاهرة المليونية النهاردة من كل قلبى ...لإنى أولا مش مفرطة فى دم الشهدا وقلبى مش هيرتاح إلا لما قتلتهم يتعدموا فى ميدان عام ضربا بالرصاص ॥ويتحاكمو محاكمة عسكرية ॥تتناسب وحجم الجرم ...زى اللى روعوا الآمنين بالظبط أيام الانفلات الأمنى

انا مع المظاهرات بكرة لإنى عايزة العناصر الفاسدة القذرة فى الشرطة تتحاكم وتتحاسب وتتفصل من الشرطة ...عشان أقدر أأمنهم على نفسى وأهلى ॥وأبص لهم باحترام لإنى واثقة إن اللى موجودين هما اللى قدروا يقاوموا دوامة الفساد الحقيرة ويفضلوا شرفا فى وسط قذر ॥وهيعرفوا يدافعوا عن البلد دى بمتاحفها بآثارها ॥بولادها من قلبهم ...
مش زى اللى نهبوها وهددوا أهلها

أنا مع المظاهرات عشان أنا شايفة إنى أستحق معاملة المساواة اللى ربنا أقرها وشرعها ॥وناس عملت لنفسها مقام كبير على حسابى وحساب بلدى وهما مايساووش ॥لأنهم مالقوش اللى يقفوا لهم ويقولوا لهم لأ

أنا مع المظاهرات لأنى شايفاها صح وبتحقق للبلد و أهلها إنجازات فضلت تحلم بيها سنين ॥وتتحسر ع الحلم اللى بيموت فى كل لحظة

بس اللى شايفنى غلط ...وشايف إن مصلحة البلد هتتضر بالمظاهرات ॥وخايف على مصلحة البلد من قلبه॥أرجوك ...ماتخونيش وماتسفهش رأيى
من فضلك ॥حاول تقنعنى بمنطقك ...بكلامك وبعقلك ॥
وإن ما اقتنعتش بكلامك...من فضلك ماتخونيش ...بس اثبت لى بتصرفك غلطى ...شايف المظاهرات غلط ...اعمل اللى انت شايفه صح ॥خليك قدوة ليا ولغيرى من المقتنعين إن المظاهرات صح ومفيدة

لكن من فضلك ॥ماتحجرش على رأيى ।ولا تتهمنى بحاجة معاكش عليها دليل ॥لأن ده يسىء لك أكتر منى بكتير ...وانت جزء منى ...لأننا كلنا خلاص ॥فى مركب واحدة ॥وهمنا واحد ॥ويهمنى أوى إنك تكون بخير

وربنا يسلم مصر ...والوطن العربى كله يارب ॥ويدوم لنا وطن سالم آمن بيتقدم كل يوم للمستقبل

** بالمناسبة دى مش نوت عن الثورة ॥أنا ناوية ارغى كتير فى نوت شخصى واهلوس براحتى بقا ॥بس مش وقته ...الجاى كتير باذن الله
وبالمناسبة تانى ...باحبكم أوى

***للسادة المخبرين لو حبوا يدخلوا ....ماتسيبش تعليقات تعلى لى ضغطى وحياة ولادك ॥كفاية عليا القذافى و ولاده ...وشوية ناس كمان॥مبهدلين لى صحتى والله ...واساسا المدونة ماحدش بيدخلها ॥انا بس باحب افضفض ॥بس منورين يارجالة :)

بلدى بتتحرر- مصر يارب

مصر بتغلى ..الناس بدأت تفوق بجد
وأرجوكم ..كل اللى يقدر ينزل ينزل
بس يخلى باله ..ماحدش ينزل لوحده ..انزلوا فى مجموعات واحموا ضهر بعض
وابعدوا عن الأماكن اللى الأمن بيتجمع فيها ...مش شطارة ان حد يتقبض عليه ...الشطارة ان الموضوع يستمر للآخر ونحقق مطالبنا ..وبأقل الأضرار
وكمان ياريت لو معاه شال قطن يغطى بيه وشه لو رموا قنابل وازازة مية عشان يغسل وشه من اثرها
واحد من اللى كانوا هناك قال ان فى قطرة بديلة للدموع كويسة أوى لازالة اثار القنبلة على العينين ..
ماحدش يحاول يشتبك مع الأمن ...ويستحسن لو تتظاهروا فى أماكن صعب المدرعات توصلكم فيها او تدخل وسطكم ...المحافظة على تكتلكم مهم اوى !
غير أنهم مش أعدائنا ..وكتير أوى منهم متعاطفين معانا..ومنهم اللى هتفوا أصلا فى المظاهرات فعلا مع اللى نزلوا !
الناس هتكمل فى القاهرة على فكرة ...مش هيسيبوا حقوقهم تضيع ولا هيسكتوا عن حقوقهم تانى
اللى اتضربوا واللى اعتقلوا والامن فرقهم ..مجرد مابيقدروا يرجعوا بيرجعوا ويتظاهروا تانى
ارجوكم...اللى يقدر ينزل ينزل ...الناس دى بتدافع عن حقوقنا كلنا ..مش بتدافع عن اى حاجة تانية
الناس دى جزء مننا ..دول احسن مافينا ..ماتسيبهمش يضيعوا
اللى يقدر ينزل ينزل ..ارجوكم
واللى يقدر يساعد بأى شىء يساعد
اللى يقدر يوصل الأخبار الحقيقية الموثقة لوسائل الإعلام وخاصة اللى بره يوصلها
واللى يقدر يساعدهم ويتابعهم على النت يتابعهم
واللى مش قادر ينزل ...ومش قادر يقدم لهم أى مساعدة
أرجوك ..ادعى لهم ..ربنا يحميهم ويحفظهم
ولو شايفهم غلط ..ادعى لهم ربنا يهديهم على الأقل ...
مش هتخسر حاجة
يارب احمى كل اللى نزل يدافع عن حقنا ...ورد شر كل اللى بيحاول يؤذى بلدنا يارب ..يارب احفظ مصر من كل شر
يارب احمى كل مصرى واحفظه ..فى نفسه وفى بيته وفى ماله وفى أهله
يارب ثبت أقدامهم وآمن روعاتهم وسلمهم
يارب اجعلهم على قلب رجل واحد فى الحق
وولى بلادنا من يصلحها يارب وينشر العدل فيها
اللهم امين

تونس ...مصر ...ياااارب

ألف ألف مبروك لتونس ...ويارب يتمم نصركم على الظلم للآخر
وكل شعب عربى بيرفض ظلم وبيدافع عن حق احميه يارب
ويارب ..احمى بلدى مصر وكل من يريد بها خير
يارب قدرنا على دفع الظلم ...يارب قدرنا على دفع الظلم
يارب احمى كل اللى نازلين بكرة يدافعوا عن الحق
يارب ...يانصير المظلومين ...يا حق
احمى بلدى يارب ...واحمى شبابها وانصرهم على كل ظالم ومنافق
ياااااااااارب ...احمى كل مصرى وكل عربى وكل إنسان نازل يدافع عن حق
يارب اجعلها نهاية للظلم ..وبداية خير
ويارب ..قدرنى أكون كلمة حق للنهاية يارب

ولما ييجى الوقت ..قدرنى أكون فى المكان المناسب

عودة فبراير...عمل مشترك

فبراير لن يأتي مجددا ..

أنا سأعود لفبراير الماضي

حيث أنت مازلت هناك

حيث كانت تصرخ السماء رعداً

وترتعش برداً ...

وكنت أنعم بأمانك ودفئك

سأعود لعلي أجدك

لعلي أجدني هناك معك

حيث حاولت جاهدة كل تلك السنوات

أن أسجن ذكرياتنا بداخل عقلي

كي تكون ملاذي عندما أفشل

في أن أجدك

بالتأكيد سأعود لفبراير

ربما

وربما فقط

حينها لن يقتلنى الألم

لن يزلزلنى الرعد

ولا يرجفنى البرد

لأنك لم تعد هنا

سأعود لفبراير كى أبحث مجدداً

ربما أجد سبب

علة

دعتك للرحيل

كى أجد سبب

وعلة

تدعونى للصبر

ومعاودة الرجوع الي فبراير

هذه أنا

أبحث من جديد في الماضي

أنقب عن احساس ..

عن دفء

عن أيام فقدتها

حيث ليالينا

وأحلامنا الطويلة

وقمرنا الفضي

لأنني سأعاود محاولة الرجوع إلي فبراير

علّني أجدك

ومع كل رعشة أحاول العودة ...ربما أجد بعض دفء

وأبداً لا أجده

ومع كل لحظة

تبهت ذكرى الأمان

وتتضح حقيقة رحيلك

قد رحلت ...وأعذارى إليك تبهت وتضعف مع كل لحظة

قد رحلت...

ولم تترك ما يشفع لك من الدفء ..

.سوى لحيظات فى عمر زماننا ..

وتركت سنين

من عمر زمانى

شاهدة عليك

ألماً ..يتجدد مع كل فبراير

مع كل فبراير يتجدد ألمي.. وأملي

في أن أجدك

تعاودني همساتك بشكل مفزع

وصوت عال

يطغي علي صوت عقلي الذي يحثني علي الرحيل

تأمرني بالرجوع اليك

تأسرني داخل ذكرياتنا

وأبداً

لا أحاول الفرار

مسكينة أنا

فريسة تتجه نحو فخها بكامل إرادتها

تتجه نحو فخها الحبيب

كيف لم أتنبه من قبل عن مدي أنانيتك

عندما رحلت

كان الندم يعتصرني

كان قلبي يؤنبني

ليل نهار

علي ذنب لم أرتكبه

كنت أتعذب عوضاً عنك

أتعذب من أجلك وأنت

..

لا تبالي

..

كفاني

..

كفاني ظلماً لنفسي

لن أحاول حتي تذكر فبراير القديم

ولن أعود

إلي ذكرياتي

..

بل سأنتظر فبراير جديد

ملئ بالأمل وخالي منك
*********
العمل ده أساسا بتاع تومى
صاحبة مدونة بحر الحياة
بس انا رخمت وكتبت معاها
وهتلاقوا البوست على مدونتها برده

سؤال !!!!

هو إحنا لو لغينا الإحتفالات ...مش كده نبقى سمحنا لهم ينتصروا علينا فى انهم يكسروا الفرحة فى قلوبنا؟!!

بس لو تم الإحتفال ...أهالى الناس اللى ماتت أكيد هتحزن

وأكيد المصابين مش هيعرفوا يحتفلوا!!

امممممممممممممممممم

طيب هو ماينفعش نعمل زى ماعملنا مع والدة خالد سعيد وأهله

إننا بدل ما نلغى الاحتفال ...نتجمع عند أهالى الضحايا ..كلنا ...ونحتفل معاهم ونواسيهم!!

وبدل ما نتفرق زى ماهماعايزين وكل واحد يحزن لوحده

ما كل واحد يحاول يفرح ويواسى أهله واخواته

ولا إيه رأيكم؟!!!!

أكيد هتشتى ...برغم كل شىء متفائلة!

"كل اللى بيقولك بحبك دول نفاق

أنا لما قلت لك بحبك

كان نفاق"**

يارب تشتى ...بقالى تلات تيام باقول يارب تشتى عشان بداية السنة تكون جميلة ...مطر يغسل الدنيا من كل اللى القرف اللى فيها ...

كنت مستنية البمب والفراقيع والبالونات بتاعت أعياد المسيحيين ...خاصة ان فى كنيسة كبيرة قريب من بيتى ...وباعدى عليها فى الرايحة والجاية ...وأكيد هاخد بالى من مظاهر الاحتفال ...ولبس العيد ...كنت مستنية افرح وازقطط ...

ليلتها قعدت اتفق مع مارى على البالونات والصفافير...وهنقضى راس السنة ازاى!!

اصحى تانى يوم ....ألاقى دم وجثث وتفجير....طب ليه؟!!!!

الاقيها بتقولى ان تلميذتها اتصابت ..تلميذتها اللى يمكن عمرها اقل من 12 سنة ...تلميذتها وجدها...و والدتها وابن عمها اللى غالبا هيبقى فى نفس السن يمكن!

اوكى كلنا عارفين ان فيه احتقان ...وغمزات من تحت لتحت ...وبتحصل يعنى ...وناس تضحك فى وش ناس وتذمهم فى ضهرهم من الطرفين :) بتحصل وكتير جدا ...هى تقريبا طبيعتنا اننا ناكل فى بعض ...بما اننا مش قادرين نعمل حاجة فى اللى ناهشين فينا ...فبنتسلى على بعض !!

اتحولنا وبقينا بألف وش ...عشان نقدر نتعايش فى وسط الظروف القذرة ......بس لسه فاضل جوانا جدعنة وشهامة

لسه جوانا ان اللى يقع فينا نسنده ...مهمن كان ...لأننا بطبيعتنا شعب أصيل ...شعب عنده مروءة ..ولو ان ساعات بتتوه فى الزحمة وسحابة التخلف السودا بتغطيها !!!

بس فى الأصل موجودة .....والحادثة أثبتت

رد فعل وليد فكرى وسارة درويش ...ردود فعل عادل ومارى وحنان وإنجى ....

رد فعلى مفاجىء بالنسبة لى ...أنا ماطلعتش بوشين ...أنا طلعت بقلب واحد..قلب اتوجع أوى اول ماعرف الحادثة...واتحسر على فرحة ماتمت ...وعلى مطر ماغسلش القلوب ...

وبصراحة الوجع مش مخلينى عارفة اكتب اقول إيه!!

تفتكروا أندد وأشجب واعترض؟؟

بيتهيألى أبسط رد فعل انى مش هاقدر ابص فى وش نفسى تانى ...

انزل مظاهرة او وقفة غاضبة؟!

ساعتها الأمن هيعمل اللى ماقدرش يعمله فى اللى دبر الحادثة ...واديى المتظاهرين متوفرين وموجودين ...وياريت بفايدة للضحايا !!!

طبعا المناداة بتغيير الإدارات والوزارات والحاجات دى ..مفروغ منها ...انها مش هتتعمل...بس ممكن يخلوا وزير الإعلام وزير التعليم ووزير التعليم وزير الصناعة ...كنوع من الطبطبة على مشاعر المجروحين!

عشان اكون صريحة جدا جدا معاكم ...انا مارضيتش اشوف الفيديوهات ...مارضتش اركز اوى فى الكلام ...منظر الدم على باب الكنيسة وفى الأرض..بيوجعنى أوى ....

مش عايزة أصدق ...يمكن عشان عايزة أفرح ..يمكن عشان مش عايزة أحس اننا وصلنا للمرحلة دى من الهوان اننا الغُرب ينهشوا فينا وكل اللى يتقدم لنا ...شوية وشوش مدهونة بودرة بزيادة ..تغطى الخيبة والعجز وقلة الحيلة ..تغطى العار وتحاول ترسم صورة كانت سبب أساسى فى تخريبها!!

الغريب انى رغم كل ده متفائلة!!!!

متفائلة بينا ..إن رغم كل اللى بيحصل لسه فيه ناس عاقلين ...ناس بتحب البلد دى وخايفة بجد ...متفائلة انى طلعت مش بوشين ...ولو ان لحظات الحقيقة بتوجع :) متفائلة لأننا لما تخرب خالص ...أكيد هيكون فيه موجودين لسه شوية يقدروا يبنوا ...مش الكل هيسيب المركب وهى بتغرق ...لسه فيه ناس عندها استعداد تقعد للآخر وتبنى وتحافظ على الموجود الكويس ...لسه فيه ناس عندها عقل تميز بين الصح والغلط

متفائلة لاننا باذن الله هنحتفل ..وباذن الله هناخد بتارنا من المجرمين

بس فى كلمة أخيرة...للى مفروض يحمونا ...لو مش عارفين قولوا..وإحنا نعرف نحمى نفسنا كويس قوى ...بس بلاش كلام فاضى وحوارات ماسخة ...بدل ماتتقلب عليكم فى الآخر ...لاننا بجد طفحنا!!

____________________

** من قصيدة جحا لهشام الجخ بالمناسبة ...ومش عارفة ليه الجزئية دى بالذات بترن أوى فى دماغى!!! والقصيدة كلها اكتر من روعة ...يمكن أجزاء تانية كانت معبرة اكتر ..بس إحساسى ...زى بقية البوست ..مجرد إحساس مكتوب وياريت يفيد بشىء :)

قانونهم للطوارىء ..وقانوننا للطوارىء

لسه قارية من مافيش ..حكاية البياعين فى ميدان الساعة ضربوا عربيات البوليس بالحجارة ...وشفت الفيديو !!

واليوم اللى قبله قرات عن خالد محمد سعيد اللى مات نتيجة تعذيبه من مخبرين فى قسم سيدى جابر!

وطبعا دى لا أول مرة البوليس يتضرب ..ولا اول مرة البوليس يقتل!!

وبصراحة مطلقة ..انا لا ليا فى اعتصامات ولا مظاهرات ولا وقفات احتجاجية ...ولا شايفاها بتعمل حاجة اكتر من انها بتهدى الغضب اللى جوايا ..لا هترد للقتيل حقه ..ولا هتوقف الظالم عن ظلمه!!!

وانا محتاجة اوى للغضب ده ..محتاجاه عشان يحمينى من اليأس من شدة الفساد ..محتاجاه لانه نابع من حبى للبلد دى...محتاجاه لانه بيدينى طاقة افكر واتحرك ..ولو فى نطاق محدود اوى!

ومن واقع الحادثتين اللى فوق ..ومن واقع واقعنا المنيل بستين نيلة زى ماكل الاحداث بتوضح ..ان الفساد مش وصل للركب ..ده وصل للحناجر!

الموضوع دلوقتى بقى بين ايدين القانون ...وربنا يستر بصراحة...لان وضع الفاعلية القانونية ..وخاصة بعد احداث الغربية مايبشرش بخير بصراحة!!

بس عشان نكون صرحا سوا...مش دايما القانون بيبرد نار الضحية ...ومع حوادث زى دى ..مش هتنفع عقاب من نوعية وقف عن العمل ..ولا نظرية كخة يا حبيبى ماتعملش كده تانى ..احسن السوعك بالشمعة!!!

جرايم زى دى ..لازم عقابها يكون رادع وعبرة وعظة لكل واحد تسول له نفسه انه يفكر فى حاجة زى دى ..عقاب جريمة زى دى ..لازم يكون فى ميدان عام ...عشان الناس تشوف بعينيها ...مش تتفرج فى برنامج خلف الاسوار والمجرم بيعييييييييييييييط ...والمفروض ان الناس من كتر ما قلبهم بيتقطع ..مش هيعملوا الكخة دى تانى!

لو القانون ما اخدلناش حقنا ...يبقى لازم نعملنا قانون ياخده ..واذا كان عندهم قانون الطوارىء بتاعهم ..لازم يكون عندنا الطوارىء بتاعتنا برده!!!

الفكرة قريبة الى حد كبير من فكرة الانتخابات البديلة ..والقياس مع الفارق !!

احنا نعمل محكمة شعبية .....واللى مانقدرش ناخده بقانونهم ..ناخده بقانوننا احنا !

طبعا فكرة زى دى واسعة الى حد كبير ..لأنها محتاجة خبراء قانون ...وشخصيات ثقة تكون حكام وقضاة فيها – ودى حاجة صعبة اوى دلوقتى زى ما انتوا ملاحظين اكيد!

ومحتاجة لجنة تنفيذ رادعة وقوية وحازمة اوى اوى ...والحكم يكون نافذ المفعول وعلنى!!!

اكيد معظم اللى هيقرا ..هيلاقيها فكرة خيالية ..بس الاختيارات التانية ..زى ماحصل فى ميدان الساعة ...هيبقى مابين هجوم من الشرطة ع الشعب ..والشعب ع الشرطة..والاتنين بيطحنوا فى بعض ..تحت مليون مسمى !!

وفى اختيار اننا نسكت ...وبياعين ميدان الساعة كمان يسكتوا لما يرهبوهم وياخدوا من بضاعتهم من غير تمن ويعاملوهم شر معاملة !

وفى اختيار اننا نفكر فى حلول تانية كمان غير اقتراحى ..لانى اكيد مش عبقرية ..واكيد فى ناس اذكى منى وتفهم احسن منى مليون مرة تقدر تفيد البلد دى ...تقدر تدير البلد دى صح !!!

ممكن تفكروا معايا بجد بقه؟!

وبالمناسبة ..اللى هيحبطنى ف الرد ..يستنى بعد ما اخلص الامتحانات بقه ..مش طالبة انا عندى امتحان بكرة ومافتحتش المادة ...والحياة مش فحلقى خالص بصراحة ...من جهات كتير زيادة عن اللزوم