قانونهم للطوارىء ..وقانوننا للطوارىء

لسه قارية من مافيش ..حكاية البياعين فى ميدان الساعة ضربوا عربيات البوليس بالحجارة ...وشفت الفيديو !!

واليوم اللى قبله قرات عن خالد محمد سعيد اللى مات نتيجة تعذيبه من مخبرين فى قسم سيدى جابر!

وطبعا دى لا أول مرة البوليس يتضرب ..ولا اول مرة البوليس يقتل!!

وبصراحة مطلقة ..انا لا ليا فى اعتصامات ولا مظاهرات ولا وقفات احتجاجية ...ولا شايفاها بتعمل حاجة اكتر من انها بتهدى الغضب اللى جوايا ..لا هترد للقتيل حقه ..ولا هتوقف الظالم عن ظلمه!!!

وانا محتاجة اوى للغضب ده ..محتاجاه عشان يحمينى من اليأس من شدة الفساد ..محتاجاه لانه نابع من حبى للبلد دى...محتاجاه لانه بيدينى طاقة افكر واتحرك ..ولو فى نطاق محدود اوى!

ومن واقع الحادثتين اللى فوق ..ومن واقع واقعنا المنيل بستين نيلة زى ماكل الاحداث بتوضح ..ان الفساد مش وصل للركب ..ده وصل للحناجر!

الموضوع دلوقتى بقى بين ايدين القانون ...وربنا يستر بصراحة...لان وضع الفاعلية القانونية ..وخاصة بعد احداث الغربية مايبشرش بخير بصراحة!!

بس عشان نكون صرحا سوا...مش دايما القانون بيبرد نار الضحية ...ومع حوادث زى دى ..مش هتنفع عقاب من نوعية وقف عن العمل ..ولا نظرية كخة يا حبيبى ماتعملش كده تانى ..احسن السوعك بالشمعة!!!

جرايم زى دى ..لازم عقابها يكون رادع وعبرة وعظة لكل واحد تسول له نفسه انه يفكر فى حاجة زى دى ..عقاب جريمة زى دى ..لازم يكون فى ميدان عام ...عشان الناس تشوف بعينيها ...مش تتفرج فى برنامج خلف الاسوار والمجرم بيعييييييييييييييط ...والمفروض ان الناس من كتر ما قلبهم بيتقطع ..مش هيعملوا الكخة دى تانى!

لو القانون ما اخدلناش حقنا ...يبقى لازم نعملنا قانون ياخده ..واذا كان عندهم قانون الطوارىء بتاعهم ..لازم يكون عندنا الطوارىء بتاعتنا برده!!!

الفكرة قريبة الى حد كبير من فكرة الانتخابات البديلة ..والقياس مع الفارق !!

احنا نعمل محكمة شعبية .....واللى مانقدرش ناخده بقانونهم ..ناخده بقانوننا احنا !

طبعا فكرة زى دى واسعة الى حد كبير ..لأنها محتاجة خبراء قانون ...وشخصيات ثقة تكون حكام وقضاة فيها – ودى حاجة صعبة اوى دلوقتى زى ما انتوا ملاحظين اكيد!

ومحتاجة لجنة تنفيذ رادعة وقوية وحازمة اوى اوى ...والحكم يكون نافذ المفعول وعلنى!!!

اكيد معظم اللى هيقرا ..هيلاقيها فكرة خيالية ..بس الاختيارات التانية ..زى ماحصل فى ميدان الساعة ...هيبقى مابين هجوم من الشرطة ع الشعب ..والشعب ع الشرطة..والاتنين بيطحنوا فى بعض ..تحت مليون مسمى !!

وفى اختيار اننا نسكت ...وبياعين ميدان الساعة كمان يسكتوا لما يرهبوهم وياخدوا من بضاعتهم من غير تمن ويعاملوهم شر معاملة !

وفى اختيار اننا نفكر فى حلول تانية كمان غير اقتراحى ..لانى اكيد مش عبقرية ..واكيد فى ناس اذكى منى وتفهم احسن منى مليون مرة تقدر تفيد البلد دى ...تقدر تدير البلد دى صح !!!

ممكن تفكروا معايا بجد بقه؟!

وبالمناسبة ..اللى هيحبطنى ف الرد ..يستنى بعد ما اخلص الامتحانات بقه ..مش طالبة انا عندى امتحان بكرة ومافتحتش المادة ...والحياة مش فحلقى خالص بصراحة ...من جهات كتير زيادة عن اللزوم

وداعا ..خاطرة

بقالى فترة طويلة ماكتبتش ..لا بوست جديد ..ولا اى عمل جديد فعليا وعايزة انزل عمل جديد فى نفس الوقت ...لانى زهقت من البوستات الشخصية ...وخاصة ان الحياة ما بتتغيرش ماعدا ان الناموسة اللى كانت مقيمة عندى من السنة اللى فاتت طفشت هى وعيلتها الحمد لله ...بس كانت ناموسة صاحبة مبدأ بصراحة ...مارضتش تطفش غير لما زهقت من كتر الضرب وسبتها فى حالها تعيش حياتها ...او يمكن مالقتش دم تانى تقريبا ..الله اعلم !
بداية ..الخاطرة من 2007 .. واسيبكم مؤقتا مع كلماتها
************

حبيبى ...إنما هى رسالة وداع ، لن تصل يوما ليد صاحبها

حبيبى ..إننى راحلة بعيدا ، حيث يمكننى أن أصرخ حبيبى ولا تسمعنى.

راحلة إلى مملكة وحدة ، حيث لا أكون عبئا إلا على نفسى ، ولست بعائق لحبك لها!

حيث لا يمسح دمعى إلا يدى ،

ولا يحمينى من قسوة الحياة إلا قوة تحملى ،

حيث أدرك أنك لم تعد لى ،

لم تعد كلمة حبيبى من حقى !

حيث أدرك أنها هى من ستحميها من ضربات الزمن

أنها هى من ستحنو عليها ،

تمسح دموعها ،

تضمها مواسيا مهدهدا

وليست أنا !

سأبتعد إلى حيث لا أراك هامسا إليها بكلمات عشقك ، وآيات جمالها

حيث لا أراك تضم يديها لتدفئهما من برودة الشتاء ،

ولا أراك معها راقصا على أنغام الزفاف.

سأرحل إلى حيث لا ترانى خائفة مكسورة

حيث لا تلمح دموعى مشفقا او متعجبا

سأرحل حيث ربما أستطيع مواجهة واقعى

أو وأد حلم حبى

سأرحل إلى حيث لا تستطيع أن تعلم كم أحبك

إلى حيث لا تستطيع أن تأتى وتعطينى مالاحق لى فيه ..من حب ورعاية!

سأرحل وربما أحمل معى ذكريات حبى لك ؛

لتحمل لى بعض السعادة ، وكثير من الشقاء الذى قدر لى

سأرحل إلى حيث أكون عروس أحلامك ،حبيبتك

وطفلتك وزوجتك وأمك وصديقتك

كل ما يمكن ان تحب واكون

سأرحل حيث قلبى لك دائما

وقلبك لغيرى دائما

حيث أتخيلك سعيد وإن كان مع غيرى

حيث أكون وحيدة لأننى لا أستطيع أن أكون لغيرك

حيث لا أكون حبيبتك وتكون حبيبى

حيث لا تستطيع أن تعلم ضعفى وانكسارى

حيث لا تستطيع أن ترانى جثة قتلتها الظروف

حبيبى وداعا

تمت بحمد الله 2007

*************

نهاية ...عايز اراؤكم اوى خالص جدا

وبس خلاص

فيلم قديم

شايفين الشاب الوسيم اللى فى الصورة؟؟

شفته النهاردة فى فيلم قديم وقال جملة شدتنى اوى اوى!

الجملة بتقول ان القصة واقعية ...بس غير مكتملة للاخر !!

وان البشر بارعين جدا فى ترك قصصهم غير مكتملة ..بنهايات مفتوحة

ومن غير مبررات او حبكات مقنعة - دى من عندى- 

بس مش عارفة ليه الفيلم ده - على الرغم من انى ماكملتهوش - 

حسسنى انى كنت هارتاح اوى فى الزمن اللى اتعمل فيه!!!

بغض النظر عن كونى من عشاق الاستعراضات - المميز منها بالأخص-

بس جو الفيلم ...على الرغم من انه مليان حركة   وغنا ورقص وشغل

بس مع ذلك مافيهوش واحد فى المليون من شحنات التوتر بتاعت اجيالنا دى!

حتى الحزن اللى فيه ...حزن شفاف رقيق ...ناعم ..حزن مغرى أوى بتقمصه!

مش زى حزن  جيلنا ده ..اللى مليان مرارة وألم واللى يخلى الواحد كاره نفسه مليون مرة!

بشكل او بآخر ....كان نفسى أكون فيلم قديم 

كنت باكتب كده من عشر سنين !!!

أيها الأزرق الساحر ..الملىء بالجواهر يامن تحفظ الأسرار ،

 يمتلىء هواءك بعبير ليس له من مثيل .

أنت ملهم الشعراء ...ومحط نظر العشاق .

البعض يهابك ...يلقبك بالغادر الخائن

البعض يعشقك ويلقبك بكاتم الأسرار

ترتطم أمواجك بالصخور فى رقة وحنان

تحتويها كما تحتوى الأم جنينها

تتهادى أمواجك على الرمال فى دلال قائلة:

أنا كاتمة الأسرار !

أيها البحر العميق ..احتوينى فى أعماقك ..بين أمواجك

أيها البحر الرقيق ، رق إلى حالى ...واحتوينى بين أحضانك

أيها الساحر الجميل ..امنحنى أسرارك

انظر إليك بحب ..فهل من العدل حرمانى من أفكارك؟؟

انظر إليك بأمل ...فهل من العدل أن ترمينى بعنف بعيد عن أحضانك؟

أيها الأزرق الجميل ..هل تمنحنى أسرارك؟؟

فليكن ..ولكن أرجو ان تذكرنى

وأن تحفظ لى أسرارى.

           تمت بحمد الله

النص ده انا كتبته فى المرحلة الاعدادية ..يعنى من حوالى عشر سنين!!

تقريبا فى تانية اعدادى

ايه رأيكم فى المفاجأة دى؟؟

           

رجاء شخصى ...وهدية لماما فاتيما

مبرووووووووووك لمصررررررررررر

ويارب دايما الفوز والتقدم فى كل حاجة

ياللا اهو حاجة من نفسنا

وى وى وى

هيييييييييييييييييييييييه

مبرووووووووووووووووووووك

اول حاجة ليا رجاء شخصى منكم ...
صاحبة مدونة رياح الحنين ..صديقتى العزيزة حنان ...والدتها مريضة جدا ...دعواتكم لها بالشفاء التام ...
كمان صديقتى العزيزة ياسمين - بره النت خالص- والدتها مريضة ..وباسالكم لها الدعاء

نوجا - مش هاقول صديقتى ...لانها جنب علاقتنا بقت كلمة غريبة اصلا - متعبة بشدة ..دعواتكم لها بتجاوز المرحلة ...لأنها حقا مرحلة قاسية جدا !!

بالنسبة لى انا بقه ..محتاجة دعواتكم جدا فى الامتحانات ...وفى كام حاجة تانية
...وربنا يفرحنا جميعا
دلوقتى جه ميعاد الهدية ولو انها متأخرة!!
من فترة وانا بافكر اجمع صور البحر وابعتها لماما فاتيما ...عشان هى بتحبها
بس كل الصور اللى جمعتها مجهولة المصير فى الوقت الحالى ..وبالتالى
صورت صور جديدة ...مش متنوعة ولا كتيرة زى الاول ...بس يارب تفرحها
ويارب تفرحكم وتعجبكم انتوا كمان ...واهو سمعت نصيحة عادل فى التصوير


وادى الصور اهى

وسؤال الحلقة المرة دى بيقول ....

ايه رأيكم البوست الجاى ...احط خاطرة قديمة اوى ماحدش شافها - اهو شوية تعذيب كده-؟

نظرا لانى بعد ما الهارد باظ ...ولسه لحد دلوقتى ما اعرفش مصير الداتا بتاعتى كلها اللى عليه ...بقه عندى حالة احباط مخليانى مش عايزة اكتب حاجة جديدة!!!

ولا تحبوا ايييييييييه ؟؟

ياللا ....البوست الجاى على ذوقكم اهو ...

بذمتكم ...فى حد مدلعكم زيى بس!!!

غروب او اكثر

المرة دى مش كلام!

ياترى ايه رأيكم فى تصويرى ؟؟؟

شوية فضفضة

اولا ...ياريت بجد تسامحونى على الغياب الطوييييييل اللى فات ده ...بس بصراحة كنت مستنية ارجع لكم بخبر حلو ...او يكون الضغط اللى حاساه اقل شوية!!!

بس من الواضح ان بقه الطبيعى بتاعى كده ...بس بما انكم وحشتونى ... ف هيطلع على دماغكم بقه ...امركم لله!!

احداث كتيرة اوى حصلت فى الفترة اللى فاتت ...90% منها زى الزفت بصراحة ..بس عارفين ...ال 10% الباقيين ...بيوضحوا قد ايه رحمة ربنا واسعة ..وقد ايه ربنا كبير وعظيم ..

خسرت ناس ...وناس خسرونى ...وناس نزلوا من عينى لدرجة دنيئة ...وناس حاولت تقربلى وفشلت ...وناس حاولت اقرب منهم وفشلت ...فشلت حتى انى استقبل اهتمامهم !!

واوقات كتير بتمر باحس انى اتنين ...وساعات اكتر ...واحدة من برة ...الانسانة العادية اللى متبرمجة على استقبال الناس ...وواحدة من جوه ...بتصرخ ساعات ..وبترقص ساعات ...وخايفة على طول!!!

فى اليوم الواحد ...مشاعرى بتوصل لاعلى نقطة من الانفعال ...وبتنزل لمرحلة بلادة الاحساس ...لحد ما اعصابى بقت مرهقة 24 /7 ...محتاجة شوية بنج عاطفى ...على الاقل لحد ما امتحانات الترم تخلص ...يارب يعديها على خير يارب

وبما انى خلاص هنجت ...وعايزة انام جدا - شكل الادوية والمضاد الحيوى بدأوا يجيبوا نتيجة-

هاسيبكم مع صورة ..وإليكم سؤال الحلقة بتاعت النهاردة :

هتعمل ايه لو شفت لوحة زى دى على ارض الواقع ...بغض النظر عن كون اللوحة دى متأخدة من ارض الواقع فعلا يعنى!!

\ وممنوع الشتايم والتعليقات اللى مش ولابد على فكرة!!

ياللا ...أشوفكم فى بوست احلى من ده

سلام ياللى واحشنىىى

عزاء ....خارج نطاق الواجب

توفى إلى رحمة الله جد انجى ابراهيم

صاحبة مدونة المهم..هات من الآخر

يارب يرحمه ويغفر له يارب

ويصبر اهله ويعينهم على الفراق!!

انا بقالى اربع ساعات مش عارفة اكتب ايه!!

فاتحة اكتب البوست وباصاله بازبهلال

من حوالى اربع او خمس ساعات!!

والحاجة الوحيدة المتركزة فى دماغى

هى يوم الوقفة ...لما كنت باعيط فى المشروع

وانجى كانت بتحاول تواسينى وتقف معايا

غير كده ...الحاجة لوحيدة اللى حاساها

كانى تلميذ متذنب قصاد حيطة بيضا !!

مش حاسة باى حاجة خالص!!

او يمكن حاسة بحاجات...بس مش عارفاها!!

إنا لله وإنا إليه راجعون

عازفة الكمان ...خاطرة

أضمك ، لترتاح بجوار نبضى ، وليدفأ خشبك المعطر ببقايا عطرى ،أغمض عينى و أدّعى انه لا وجود لغيرك فى محيطى ، اتماهى فى وجودك ، لأشعر بالأمان .
تخيفنى الاجواء الغريبة ، واطمئن فقط بوجودك قربى...
قد يؤذوننى ،وأعلم أنك لا تقدر على دفع الاذى ، إلا أنك دومًا هنا ، جوارى ، أبثك ألمى وحزنى ، أقسو على أوتارك الرقيقة ، لتنتحب بدلا منى ..
أكتم شكواى فى قلبى ، لتستشعرها فى دقاته ، وتلمسها فى أناملى ، وتصدح أناتك عبر الأثير، بلا كلمات
تتحمس الجماهير ...ويلهبون أكفهم تصفيقا منبهرا...ينعتوننى بالإبداع ، وينسون أنهم اصل الإبداع ، فمنهم تألمت وآلمتك ، وبآلامنا استمتعوا .
أخفضك وأحنى جبهتى لهم ، ألا يستحقون برأيك ؟؟؟؟؟؟
تحية صامتة لتقديرهم ، قلما وجد من يصغى لأنين بشرى ، فافخر كمانى العزيز ، كون أنينك وترى .
أعترف لك يا رفيق دربى ...أننى استخدمك لأصل إليهم ، بغيرك لا يفهموننى ...لا يسمعوننى ...ولا أدرى غيرك وسيلة ، سامحنى جرمى فيك هو جرمهم معى...أتخذك جسرا لأسر اهتمامهم ..ويتخذونى جسرا لحالة يتمنونها ...
و أظل أعزف ، ومع رجفة كل وتر ستتحرر النغمات ، لتسجننى... تغلفنى كما الدمى بالشمع ...تكسبنى جاذبية البعيد القريب ، فكما تتلظى النجوم بنيرانها ، ولا يبدو لنا منها إلا ضوء ينير دروب العشاق

..أحترق أنا ولا يبدو منى إلا نغمات الكمان .

تمت بحمد الله

بوست ع الفاضى

 نفسى اكتب بوست جديد بقالى فترة ...بس مش عارفة اكتب ايه وازاى وليه!!

اكتب عن ايه ولا ايه ولا ايه!!

اكتب بقية المقال بتاع المتحرشين ...ولا اكتب عن الكتابة ...ولا اكتب خاطرة جديدة ...ولا اهلوس عليكوا من جديد!!

انكد عليكم ....ولا اشارككم ذكرياتى الحلوة!!

طيب واكتب ليه!! وايه لازمة كتابتى !!

وجع دماغ ع الفاضى ...ولا عشان اطلع شوية من اللى جوايا!!

وياترى كتابتى لها تاثير على اى حد ؟؟ ولا تاثيرها فى سلامتى النفسية فقط!!

دماغى زحمة اوىىىىىىىىى ...ومحتاجة حد ينظم المرور فيها اوى اوىىىىىىىىى

تخريب اسكندرية ...مسئولية من؟!

استقبل كثير من أهل اسكندرية المحافظ الجديد- السيد عادل لبيب- بالضيق وشىء من التوجس ، نظرا لعشقهم لسلفه محمد عبد السلام المحجوب - وهو عشق مبرر جدا ...فى نظرهم ونظرى على الاقل- وخاصة بعد ما اشيع عن ماحدث فى محافظة البحيرة من تخريب - تكسير اسفلت وارصفة وغيره- اثناء توليه السيد عادل لبيب أمر تلك المحافظة ....من بين أمور أخرى !!!

بداية توليه السلطة ظهرت جليا فى تكسير بلاط الارصفة ....وتركيب بلاط من نوع اخر ..- وللأسف نوع أردأ عمليا ...ناعم جدا وبالتالى الناس بتتزحلق عليه بسهولة جدا ...ثانيا لونه الابيض اتحول حاليا للون اسود شديد القذارة- ...وده طبعا غير ارتفاع الرصيف المهول - ونتيجته ان ناس كتير وخاصة كبار السن مش بيقدروا يطلعوا عليه- ...هذا عدا عن تغيير شركة إزالة القمامة !!

تتالت الوعود من المحافظ بتحسين الاوضاع فى الاسكندرية مما تم تكسيره ...وتحويله الى افضل كذلك ...وللاسف لا أرى أى تحسن ملحوظ فى أى جهة ...وإلى الآن !!!

تحفظت كثيرا قبل انتقاد الوضع ...خاصة بعد متابعتى لحلقة البيت بيتك التى استضيف فيها السيد المحافظ عادل لبيب من قبل خيرى رمضان ، والذى صورت الحياة من منظار وردى مشرق ، كدت أصدقه فعلا ...لولا اقامتى فى نفس المدينة التى يتحدث عنها!!!

فى مقال سابق كنت أشكو من تردى أحوال بعض المناطق وعدم الاهتمام بها مقارنة بأماكن أخرى فى الاسكندرية ...مثل منطقة سان استفانو - والتى بعد بناء مول سان استفانو بها اعتبرت قطعة من أوربا- وبعض الأماكن الراقية نسبيا.

أما الآن فإنى أشكو تردى أوضاع مدينة الاسكندرية بالكامل...وهو ما يتضح فى الصور المرفقة بالموضوع!!

بعدما جعلت الشركة الفرنسية - اونيكس- لكل مبنى جردل القمامة المخصص له ...وكانت تقوم بصفة دورية بتنظيفه وتطهيره ، غير مجهودها الملحوظ فى تنظيف الشوارع بشكل لائق وغسل الأرصفة والشوارع ، قامت الشركة الجديدة بتغيير الجرادل بجرادل أخرى متوسطة الحجم ..بمعدل جردلين تقريبا لكل منطقة سكنية معينة بشكل شبه عشوائى ...ويتم وضعهم فى مكان ما ...ليعود من جديد التكوم العشوائى للقمامة حول الجرادل وتجمع الذباب حوله مما يجعله بيئة مثالية للأمراض والأوبئة -وتعتبر وسيط ناقل لانفلونزا الخنازير ولغيره الكثير-

نوه سيادة المحافظ فى برنامج البيت بيتك عن كم التحديثات المخطط لها ، وكيفية تحسين حياة سكان عروس البحر الأبيض المتوسط ، مثل حفر الأنفاق وتحسينات الطرق ووسائل المواصلات وتركيب مترو أنفاق ...كل هذا رائع ، ولكن أين حظ الواقع من هذه الخطط الجميلة!!!
فمنذ تولى المحافظ الجديد منصبه ، ولم نر من تلك الخطط إلا تكسير الأرصفة وتركيب بلاط جديد مكان بلاط قديم – كلاهما سليم ، تختلف الوانهما فحسب ..بدلا من اللونين الطوبى والاصفر ...اصبح البلاط ابيض تحول مع الوقت الى اسود طينى- ، اما عن حالة الشوارع ، فقد تم حفرها ليتم توصيل الغاز للمنازل – وقد تم توصيله بالفعل منذ فترة طويلة جدا – ومع ذلك لم يتم اصلاح اماكن حفر الغاز حتى الآن فى بعض مناطق الاسكندرية ، بغض النظر عن تكسير الاسفلت – والتى ظن البعض تمهيدا لاعادة السفلتة من جديد وقد اتضح ان مثل هذا الظن انما هو اثم مبين!!!
فقد تم تكسير الاسفلت منذ فترة طويلة نسبيا ، ولم يتم حتى الان اضافة طبقة الاسفلت الجديدة!!!
اما عن القمامة فحدث ولا حرج ، بعد ان كانت عاصمة الجمال ، اصبحت اسكندرية ترقد تحت اكوام من القمامة ...حتى كل الصور البشعة القادمة ...مجرد امثلة بسيطة جدا لكم الاهمال فى إزالة القمامة من الشوارع ، حتى بجوار المدارس وعلى محطات الترام!!

الصور القادمة مجرد أمثلة لحالة إسكندرية فى الوقت الحالى ...أمثلة مبسطة جدا لمن لم يراها !!

اما بالنسبة لسكانها - وانا منهم- فلهم العزاء .

الصور ملتقطة لأماكن مختلفة ، لكن هناك أماكن أخرى القمامة تحتل فيها المكان ، يعرفها جيدا ركاب الترام فى منطقة شدس ، ورشدى ومصطفى كامل .

اما بالنسبة لغير راكبى الترام ، فهو يعرفها جيدا فى طريق جمال عبد الناصر ، ويرى تجمعات القمامة فى مختلف الاماكن كمداخل بعض الشوارع ، فى العصافرة ، فى محطة مصر ، وغيرها!!

سيادة المحافظ ...سمعنا الكثير من الخطط الوردية ، ودفننا فى واقع أسود صنعته يداك ...تحت مسمى الحلم الوردى .

لذا رجاء ...اهبط قليلا إلى واقعنا ....واصلح ماتم افساده ....فيكفينا من مرارة الواقع مافيه ...دون إضافة أكوام من القمامة إليه.

والآن سأترككم مع بعض من مشاهد الواقع الناتجة عن بعض الخطط الوردية !!!

حالةلرصيف الاخر من نفس الشارع ....ومن الملاحظ وجود

الرمل والتراب المتراكم جراء التكسيرات ...وبالتالى صعوبة الصعود

الى الرصيف نفسه !!

نفس الشارع ....والتكسير التام به ...حيث تم ازالة طبقة من الاسفلت

من فترة ...هذا غير التكسير الواضح فيه منذ التصليحات المفترضة!!

جناكليس ...وحالة الرصيف ...مليان حجارة وطوب ...ومن المفترض انه للمارة!!

جناكليس ...شارع عمر المختار ...وحالة الشارع المقززة!!!

جناكليس ...ِشارع عمر المختار من زاوية اخرى

ومن المفترض انهم من المكلفين بجمع القمامة !!!

ومع ذلك ...لا يوجد تغيير يذكر فى هذا الشكل طبقا لآخر مرة مررت

فى هذا المكان!!!

جناكليس ...ِشارع عمر المختار

ثروت ..شارع عبد الحميد الديب ..من زاوية أخرى

ثروت ...ِشارع عبد الحميد الديب

الابراهيمية شارع بورسعيد ....من زاوية اخرى

الابراهيمية ....ِشارع بورسعيد !!!

كليوباترا الصغرى ...امام شارع محمود الطرينى

والصورة من رصيف الترام المقابل!

كليوباترا الصغرى ...امام شارع محمود الطرينى

والكارثة الحقيقية انه بعد ذهاب عربة جمع القمامة مباشرة!!!!

فى ثروت ..امام المدرسة ..من زاوية اخرى!!!

فى ثروت امام مدرسة محمود زكى سالم الثانوية بنات

فى شارع متفرع من ذو الفقار ...بجوار معهد تعليمى

على طريق الحرية ...امام شارع ذو الفقار بجناكليس

فى ثروت ..بجوار مدرسة محمود زكى سالم الثانوية بنات

فسحة عائلية ...مع اول يوم محاضرات

يوم 10-10
طبعا اى حد طبيعى هيقول صحيت من النوم ...بس بما انى مانمتش اساسا ...يبقى نطنش النقطة دى !!
قمت جهزت لبسى ونزلت عشان اروح الكلية ...اول يوم احضر محاضرات ..وعندى من الساعة 12 لحد الساعة 6 متواصل !!!
رحت متأخرة طبعا - عادتى ولا هاشتريها - بس الحمد لله لحقت مكان اقف جوه القاعة ...بغض النظر عن الزحمة وكتمة النفس ..والكحة والعطس الشغالين ...وان الدكتورة بتشرح من غير ميكروفون - عشان عطلان- وانى ماسمعتش غير جزئية من الكلام ...ومن الوارد جدا انها ماترتبطش بالجزئية اللى بعدها اصلا!!
خلصت المحاضرة بسرعة الحمد لله ...وناس كتييييير مشيت الحمد لله ...وقدرت اتحرك من مكانى ...والاقى كرسى كمان - عصر المعجزات لسه ماخلصش يا رجالة-
هى قالت لنا استنوا الدكتور اللى بعدى داخل على طوووووووووول ...ماحدش يمشى ، وطبعا الدكتور جه بعد حوالى ساعة الا ربع ...وماسك فى ايده المايك - لوولولولولولى - ....بس ماعرفناش نشغله -هع هع هع- ..راح مشى وقال انا راجع لما المايك يتصلح ...طبعا كل الناس ماصدقت ومشيت ...جه واحد يادوب ضغط على زرار فى جهاز تبع المايك ..المايك اشتغل على طول - كان على وشه حتة تعبير ...فاتكم بجد- وللأسف الدكتور رجع تانى ..وقعد يتكلم وبتاع ...وخلصنا على الساعة 2 وربع ...والمحاضرة اللى بعدها تبتدى الساعة من 4 لحد 6!!!
اتصلت بنوجا ..وسألتها على لقاء المدونين السكندرى ...الشبكة كانت زى الفل ...تلات اربع كلامها ماسمعتهوش ...بس الاجمالى ان احمد ما اتصلش ..وبالتالى معندهاش فكرة عن اللقاء ...بس اول ماتعرف هتتصل بيا وتقولى ايه النظام !!
طبعا قعدت محتارة ..اروح ولا استنى ..فى الاخر قررت استنى...رحت جبت سندويتشات واتغديت ...واخدت الدوا ...وعلى الساعة 3 ونص رحت للمدرج ..واستقريت هناك ....واكتشفت ان مصر جابت جوووووووووووووووووووووووووون .

4 الا ربع انجى اتصلت ...والسماعات اصلا كانت فى ودن سمر ساعتها وقالت لى احمد اتصل ..وهما هناك فى عزة ..هتروحى يا ريم؟!

لو انتى رايحة انا رايحة ....ها هتروحى ؟ ....واتفقنا نتقابل عند عزة على البحر ... وكانت اول مرة اروح لعند عزة لوحدى من غير نوجا ...وبالتالى اتوترت جدا ...بس ربنا ستر وواحدة صاحبتى من تربية طلعت قاعدة جنبى -للاسف مش فاكرة اسمها ...على الرغم من اننا فضلنا زمايل فى تربية سنتين تقريبا ...بس ده بيوضح حالة الذاكرة عندى عاملة ازاى- ..وقعدنا نرغى لحد ماهديت شوية ..ونزلتنى عند عزة ...اتصلت بانجى ...وقالت لى انها فى السكة .... شوية ووصلت وعدينا السكة وسلمت على احمد وعرفتنى عليه - ريم صاحبتى الانتيخ - وانا طبعا فى حالة رهبة وكسوف - اول مرة احضر لقاء من النوع ده ...ده غير انه ماحدش عارفنى اصلا - واتعرفنا على عادل وبدراوى وحنان وهبة _ كلهم مدونين - واتعرفنا كمان على فاتيما - فاطمة والدة يوسف - وكمان صاحبة مدونة حروف - للاسف مش فاكرة اسمها ..سامحينى معلش ..بس زى ماشفتى فوق ..ذاكرتى فيها ثقب اوسع من ثقب الاوزون- وفى كمان مدون افتكرنا - نوجا وانا - اخوات - فرحت اوى اوى اوى ساعتها - ...وناس كتير تانية ..بس للاسف انا كنت مرتبكة بقه وبالتالى كل ده ضاع ...معلش بقه !!
المهم بعدها مشينا ..ومشينا ....ثم مشينا ...وفضلنا مش عارفين رايحين فين ..لحد ماوصلنا الشيخ وفيق فى رأس التين - اول زيارة ليا للمنطقة دى فى اسكندرية على فكرة - ...وانجى يا عينى طلعت كانت واخدة نفس المشوار مشى عشان توصل لعزة ..قعدت تصوت ...انا لسه واخدة نفس المشوار مشى ....- واحتمال تكون بتدعى عليا فى سرها ساعتها-
المهم ...قعدنا شوية فى الشيخ وفيق ...وتقريبا الجرسون كان قريب عزة اللى كنا بنشتم فيها ...لأنه كان فاضله تلات دقايق ويولع فينا ...وشوية وقمنا - انجى وحنان وعادل وانا معاهم طبعا - وطلعنا نقعد على شاطىء راس التين ...اول ما دخلنا اكتشفنا ان فى 4 كلاب ..مسكت دراع انجى ...ياللا بينا نروح يا أمى ...بس بعدوا بقه ..وكان فى ولد صغير بيضرب كلب فيهم - المنظر ده ضايقنى بغباء- ووقفنا قرب المية اوى ...حنان وانجى لعبوا طيارة مرتين ...- مش باعرف العب انا اساسا- وفرحوا بيها اوى اوى الحمد لله ...بعد كده رحنا بلينا رجلينا كلنا ...والجيبات طبعا ..يعنى احنا نتبل والجيبات لا!!
بعدها بشوية احمد جه ...وبعده كلهم خلصوا وجم ....وقعدنا نتكلم ونهزر ...وانا استغلبت الفرصة ...وقعدت اتمشيت على الرمل المبلول بالمية ...وكل مرة الموج ييجى ....وانا ابعد ...ابتدى ادوخ - باخاف من البحر جدا ساعات - احترم نفسى وامشى - الادب فضلوه عن العلم برده -
الدنيا بدأت تضلم بقه ...وقلنا نروح ....ومشينا من على الشط على انغام اغنية ذهب الليل وطلع الفجر
فضلنا واقفين بره شوية على الشارع ...وسلمنا كلنا على بعض ...ولقينا مشروع الحمد لله واحمد ركبنا ودفعلنا ...
بس بعد شوية نزلنا عشان ناكل وكده ....وبعدها روحنا بقه ....وانجى كانت نيماااااااانة جدااااااااااااااااااااااااااااااااا وزورها كان واجعها اوى يا عينى
وبكده اليوم انتهى ...خلاويص
شوية كلام على جنب
نوجا : احلى احتفال ممكن يتعمل بمناسبة نجاة براثن الاكتئاب من شخصى المتواضع .... والسر الخطير بقه ...اغنية ذهب الليل وطلع الفجر كانت جاية كمفاجأة - اول ما سمعتها ضحكت ضحك - مفاجأة زى العسل بجد ....ويوم جميل ..واحلى احتفال بالعودة للحياة الطبيعية- ولو انى كنت مرعوبة ليغمى عليكى من قلة النوم وعدم الاكل ...بس ربنا ستر الحمد لله .
حنان : عسولة جدا ...وبعد شوية حسيت كاننا اصحاب من فترة وعارفين بعض من زمان ...واتفقنا اننا هنتقابل تانى باذن الله بعيدا عن لقاءات المدونين - جيران بقه ...حد عنده اعتراض ؟؟-
هبة : عسولة جدا ...اول ماشافتنى قعدت تتعرف عليا واخدتنى من ايدى عشان تعرفنى على الناس تقريبا ..وحاولت تخرجنى من حالة الذهول اللى انا فيها ....وبرده قالت لى لنا لقاء كسكندريين تانى ...انت بس حدد الميعاد والمكان يا جميل وهتلاقينى موجودة باذن الله - ونوجا معايا طبعا ...اتوه لو جيت لوحدى ..وماينفعش حد يمشى من غير انتيخته برده
أحمد : اخيرا انجى شافتك!! ...كل مرة تيجى سيرتك واحنا قاعدين ..تكلمنى على لقاء المدونين ..وتقولى تخيلى يا ريم ..جارى وماشفتهوش قبل كده خالص!! ......... احمد فكرنى جدا بواحد قريبى على فكرة...له نفس اسلوبه ...والشكل العام كمان ..اتشرفت بيك بجد يا احمد .
عادل : شخصية مرحة جدا ...كان معانا على طول ....واخد انطباع انى مصدومة او مزبهلة على طول الحمد لله - اعمل ايه انا طيب ..وشى تعبيراته قوية شويتين!!!- برده فكرنى بواحد قريبى - واحد تانى غير اللى فوق- باسلوبه والشكل العام برده ....اتشرفت بيك فعلا يا عادل .
ماما قاتيما : سلمت عليها مرة اول مارحت ..و وانا ماشية ...وقالت لى واحنا ماشيين اننا هنقعد مع بعض المرة الجاية اكتر باذن الله ...مستنية اليوم ده بفارغ الصبر .....ماما فاتيما من الناس اللى لما تقف معاهم بس ...تحس انك فى واحة ..تحس انها أم فعلا ..جو من الحنان والرقة بيميزها ...فرحت بجد انى شوفتك
بقية الناس اللى لسه ماعرفتش اساميهم ...سعيدة بيكم بجد ...ويارب اشوفكم تانى واكون تجاوزت حالة الارتباك الاولى ..واتعرف بيكم كلكم من تانى
بالنسبة لى ...انا حسيت انها زى حفلة عائلية ...واننا كلنا اخوات وسط بعض ...خارجين نتفسح ....فرحت اوى اوى باليوم ...واتمنى يارب انه يتكرر تانى كتيييييييييييييييييير
كان معكم من بيتنا
ريم وجيه

** الصورة اللى فوق دى من تصويرى - فرحانة بقه بالموبايل الجديد- من على شط راس التين ...فى صور تانية للشط احتمال اضيفها فى بوست تانى لوحده ...ياللا سلام

عوانس فى الفالانتين ....محاولة ساخرة

\" بت يا سنية ... شوفتى عنايات ماسكة فى ايد سامح ازاى ؟؟ هى خايفة ليتوه منها ؟ ولا فاكراه هيتخطف؟"
\\" لا تلاقيه خايف لتكون جايبله كلب بمناسبة الفالنتين !!"
\ كلب!! وليه بقه ان شاء الله ؟"
\\" اصله جاب لها فار ، وقالها فكرة جديدة ، بس مش متاكدين اذا كان ده عشان يقتلها من الخضة ، ولا بيشوف قدرات احبالها الصوتية؟؟!!"
\" ههههه ... تلاقيه اخد صدمة عمره ، لما اخدت الفار بالحضن وباسته كانه ابنها ، وقعدت تسبل له نص ساعة وتشكر فيه "
\\" هو انتى كنتى هناك يا نيلة من ورايا ولا ايه؟!!"
\" ياريت ... دول قالوا لى انه اثار الصدمة لسه على وشه لحد دلوقتى ، وانه بيخاف يمسك ايدها دلوقتى ، عشان اكلت بيها الفار "
\\" جتها القرف دى كمان ، بس يستاهل ، عشان يبقى يستنضف الهدايا اللى يجيبها "
\" بس تفتكرى هتجيبله كلب بجد!!!!"
\\" ما اظنش .. بس ممكن تجيب له سحلية عشان يفتكرها بيها "
\" هههههههههههه ..اقل واجب .. خليه يشرب"
\\" عارفة بافكر فى ايه ؟"
\" الشنطة بتاعت البت عنايات دى جايباها منين؟؟ انا شوفت واحدة زيها بالظبط ب 10 جنيه فى البلد !"
\\" لا يا اختى انا شفتها بسبعة ونص فى السوق ،
انا كنت باقولك انا بافكر فى ايه ، مش اسعار الطماطم ايه!!"
\" ياااه على رخامتك بت ، انتى هتقعدى تقولى بافكر فى ايه ، و وانا نايمة باحلم بايه ،وانا مالى يا امه ، ماتخلصى وتقولى بدل المقدمات دى ، احنا مش فى مجلس الشعب يا حجة"
"\\ انا مش عارفة ايه اللى بيخلينى اقعد مع الاشكال دى بس .. يا ساتر "
\" اشكال يا زبالة ... انتى كان حد معبرك اصلا ، ده انا قاعدة معاكى شفقة ، احسان ... عشان ماتحقديش على شعبيتى وتبقى شخصية اجرامية حقودة على الناس اللى ليهم شعبية زيى "
\\" شعبية يا بيئة ، دول بيكلموكى عشان يتقوا شرك وشر لسانك الزبالة ده"
\وقبل ما تكمل دلال مساجلة الردح الخفيف ، تحولت ملامحها من ملامح ريا وسكينة ، لملامح ام الهول احدث طراز
تعتقد سنية هنا وبأمل زائف انها فازت بجولة الردح الخفيف لاول مرة ، الا انه مع مرور الوقت ، ومازالت دلال ترتدى قناع ام الهول ، مع تعرض فمها لدخول الذباب والحشرات الطائرة ، ضربتها بكوعها فى جانبها الايسر بشىء من السادية ، مستغلة فرصة ذهولها
\" مالك يا بت ؟ متنحة كده ليه ؟ الدبان بيتفسح فى بقك يا نيلة !!"
\\" جتك القرف فى ملافظك ...دبان ايه وفليت ايه ... ومتنحة من المنظر اللى شايفاه طبعا !! "
\" منظر ايه تانى ... انتى محسسانى اننا قاعدين فى سينما !!"
\\" اول مرة اعرف مواهب البت عنايات فى الغسيل !"
\" غسيل!! ... انتى سخنتى ولا ايه ع الظهر كده ... كله من الاحمر اللى شبه بقع الحصبة دى !!"
\\" حصبة !! .. انتى بتدعى عليا يا بت ولا ايه؟؟؟؟؟؟ اقول ايه ... ما انتى غلاوية من يومك ... يا حمارة انا باتكلم عن عنايات .. لو بصيتى هناك هتلاقيها ماسكة جاكت سامح وعمالة تدعك فيه ، ولا اجدعها غسالة محترفة دعك !"
\" يا اختى ... اهى حاجة تضمن بيها مستقبلها ...الشهادات دلوقتى ماتساويش الحبر اللى بتتطبع بيه ... وكل ما يشوفوا خلقنا فى البيت ... ذاكرى عشان تلاقى شغلانة كويسة ...وعشان عريس كويس يرضى بيكى .. وادينا ولا برص احول معبرنا ... حاجة تقرف!!"
\\" هههههههههههههههههههههههههه ... لا بالمنظر ده هى هتشتغل بودى جارد ...مش غسالة!! ههههههههههههههههههههههههههههههه "
\" لا انتى اتهطلتى رسمى ... بودى جارد ايه يا موكوسة انتى؟ "
\\" سامح جوا الجاكت ... واخد له فومين هو كمان !!! "
\" تلاقيها عاوزة تثبت له قد ايه هى ست بيت شاطرة عشان يستعجل نفسه شوية ويتقدم لها ..دى ارضية الكورنيش دابت من كتر ما اتمشوا عليها يا بنتى"
\\" ولا تلاقيها جابتله هدية الفالانتين شوية مسحوق غسيل .. هدية غير تقليدية برده !!!!"
******************