أخبار حلوة :
** صديقى العزيز طارق عميرة - صاحب مدونة كوارث- نشر عن كتابه "ناثر البخور" مقال فى الدستور ...أراه يستحق أفضل منه ...على الرغم من المديح به ..وادى اللينك
وبالمناسبة ...وعدته يوم حفل التوقيع السكندرى انى هانشر رأيى ولسه لحد دلوقتى مانشرتهوش من يوم 28-2 ...بس الكسل زى ما انتوا عارفين ....والتحليل موجود على الورق من اكتر من شهر ...واحتمال تشوفوه قريب ...بس ده سر!!!
**دكتور صلاح - دكتور السنان بتاعى واللى باعتبره فى مكانة اب بالنسبة لى- بقه عنده حفيد تانى غير فريدة بنت بنته ...واسمه ياسين بس ابن ابنه اللى هو الدكتور محمد !!
هتقولوا لى ايه علاقتك بالخبر ..هاقولكم انا بافرح بالحاجات دى اوى ..وخاصة لو فيها اطفال ..بتقلب معايا بهطل شوية ...وهابقى اقولكم على المواقف اللى تثبت بعديييييييييين!!!
نقلبها غم بقه !!!
اخبار مش حلوة :
** عبد الله العباسى ..- صاحب مدونة - كلمات متقاطعة -....أخى الأصغر وصديقى العزيز تعبان جدا ومتألم جدا ...خالى سامى تعبان جدا ...وخالتى كمان عيانة ....ثلاثة من أعز الناس على قلبى وأقربهم لى لا أملك لهم إلا التضرع إلى الله عز وجل أن يشفيهم شفاء لا يغادره سقما ...وان يفك كرب كل مكروب وأن يشفى مرضانا ومرضى المسلمين جميعا يارب ...ويعفو عنهم ويخفف ألمهم ويجعله فى ميزان حسناتهم ..اللهم أمين ...دعواتكم لهم .
**جد انجى ابراهيم - نوجا صاحبتى وكنزى فى اصعب الاوقات- صاحبة مدونة المهم ...هات من الاخر ...تعبان جدا ..ربنا يخفف عنه يارب ويجعله فى ميزان حسناته ....اللهم امين ...دعواتكم له .
** نوجا - اللى هى ذات نفس اللى فى الخبر اللى فات- كتفها واجعها ...الف سلامة عليكى يا نوجا
** المرة دى ..انا اللى عاملة حادثة ...عربية كانت هتدوسنى وانا مروحة يوم الجمعة ...الحمد لله جت سليمة من غير اى خدوش او كدمات ...بس اللى منرفزنى انه خض رشا - اختى الاكبر منى على طول- جامد اوى ..ونكد عليها بعد ماكانت روقت !!! ونفسى الطشه قلمين بسبب الموضوع ده بصراحة !!!!
هلاوس ...من اجل سلامتى النفسية ::
**انا تعبانة جدا ...حاسة بألم مجهول المصدر مخلينى عاوزة اصرخ لحد سنة جاية عشان يخرج من جوايا ....بس المشكلة انى باكره الصوت العالى!!
**بافتكر دايما مسلسل جراي اناتومى ...لما ميريدث استسلمت وسابت نفسها تغرق ....ديريك نزل وطلعها من المية ...بس صاحبتها هى اللى فضلت وراها لحد مافاقت ...كل الناس يأست ..إلا صاحبتها ...فضلت تنعشها وتقولها قد ايه هى مهمة فى حياتها وانها شخصها المفضل "my person" ............................................................. ياترى لما اغرق ...هالاقى اللى يفضل ينعشنى واللى اكون من الاهمية فى حياته ومهما غيره حاول ...يفضل عنده أمل فيا ...فى رجوعى للحياة تانى!!
** حاسة انى فى دوامة عمالة بتلف بيا كتير اوى ..زى بتاعت الملاهى كده ...نفسى انزل واقف على ارض ثابتة ...لمجرد انى اتكوم عليها واقعد اعيط واطلع كل اللى جوايا
**قلبى مسجون جوا ضلوعى ...ونفسه يطفش ويطلع يجرى منى ...عشان يتنفس شوية ...ماحدش يعرف يجيبله جواز سفر مضروب عشان يخلع على بره!!!!
**بأكره دور الضحية جدا ...بس عايشاه اليومين دول بامتياز ...مع حالة شفقة على الذات ...لا بأس بها على الاطلاق !!!
** بيقولوا لى انى بأمر بكوارث وبلاوى ...ماهى مصر كلها بتمر بكوارث وبلاوى .....الحزن والألم اشياء بديهية جدا فى الحياة ...كلنا جربنا منها ...بس المشكلة الحقيقية ...انى حسيت بكل الكوارث اللى حصلت على مدار 21 سنة فاتت ...مرة واحدة!!!!
** نفسى أنهار ...مش عارفة ...طيب أنفجر ..برده مش عارفة ...حاسة انى محتاجة حد يوصلنى للحالة دى ..ازاى ؟؟؟برده مش عارفة...دى مشكلة الشخصية اللى هتوصلنى للمرحلة دى
** حالة قرف رهيبة ناحية كل اللى اتسببوا بالحالة اللى انا فيها ...اشمئزاز عام اعتقد انهم يستحقوه كليا !!
** احتمال أموت دلوقتى ... أو كمان تلات دقايق ....ياريت تدعوا لى بالرحمة ..حتى لو مامتش ...الرحمة تجوز على الميت والحى
** ناوية باذن الله اكتب حاجات باسلوب مختلف ...بس الارادة صفر ..والعزيمة صفرين على الشمال ..دعواتكم ربنا يقدرنى
** نفسى امشى على البحر ...احس بدفا الرمل والموج على رجليا ...وبنسمة الهوا بتحرر روحى من الغبار اليومى ..مشاكلها وهمومها !!
**" انجى جاتلك نعمة من عند ربنا"..... ياسمين قالت لى الجملة دى مرة فى التليفون ...وشايفاها معبرة عن الوضع الحالى بشدة ...ولو انى مشفقة على انجى من صعوبة الوضع ...ربنا يخليكى ليا يا نوجا ..ويصبرك عليا وعلى الحالة اللى انا فيها يا كنزى فى الاوقات الصعبة
**يارب شوية الفضفضة دول يفكوا الخنقة ...وحدك يارب عالم باللى انا فيه ..فإن لم يكن بك على غضب فلا أبالى يارب العالمين ...يارب ارحمنى برحمتك ...وانزل على قلبى السكينة ......يارب
